فوتو: kyrgyztimes.kg

قىرعىز پارلامەنتىنىڭ دەپۋتاتى يسحاك ماساليەۆ ەكس-پرەزيدەنت المازبەك اتامباەۆتىڭ قۋدالانباۋ قۇقىعىنان ايىرۋدى ۇسىندى. ونىڭ ايتۋىنشا، بىشكەك جىلۋ ەلەكتر ستانساسىن جەتىلدىرۋگە بولىنگەن قاراجاتتىڭ جۇمسالۋىن زەرتتەگەن دەپۋتاتتىق كوميسسيانىڭ قورىتىندىسىندا بىرقاتار مەملەكەتتىك قىزمەتكەرلەردىڭ، دەپۋتاتتاردىڭ ەسىمدەرى كەلتىرىلگەن.

"ەكس-پرەزيدەنت المازبەك اتامباەۆتى قىلمىستىق قۋدالاۋدان بوساتاتىن قۇقىعىنان ايىرۋدى ۇسىنامىن. ول زاڭ الدىندا بارلىعى تەڭ ەكەنىن، قاجەت بولسا جاۋاپكەرشىلىكتى موينىنا الۋعا دايىن ەكەنىن تالاي رەت ايتتى. سوندىقتان وسىنداي ۇسىنىس بىلدىرەمىن. ءبىز بۇل ماسەلەنى قۇقىققورعاۋ ورگاندارىنىڭ ءوزى شەشۋىنە مۇمكىندىك بەرۋىمىز كەرەك. ەگەر تازا بولسا، تازا دەپ ايتۋىمىز كەرەك. تازا بولماسا، جاۋاپقا تارتۋىمىز كەرەك!" - دەدى ماساليەۆ پارلامەنت وتىرىسىندا.

2013 جىلى قىرعىز ەلى قىتايدىڭ "ەكسيمبانكىنەن" بىشكەك جىلۋ ەلەكتر ستانساسىن جاڭارتۋعا 386 ميلليون دوللار نەسيە العان. جەتىلدىرۋ جۇمىستارى 2017 جىلى اياقتالدى. 2018 جىلدىڭ 26 قاڭتارىندا جىلۋ ەلەكتر ستانساسىندا اپات بولىپ، قالانىڭ كوپ بولىگى جىلۋسىز قالعان.

“The Qazaq Times”