فوتو: trend.az

تۇركىمەنستاندا كوپشىلىك ءۇشىن توسىنداۋ شەشىم شىعارىلدى. ەندى، بۇدان بىلاي ەلدە ءتۇرلى-ءتۇستى كولىك جۇرگىزۋگە بولمايدى. ياعني، تەك اق ءتۇستى عانا كولىك قولدانا الاسىز. ال، ەل تۇرعىندارى كولىكتەرىن جاپپاي اق تۇسكە بوياعاندىقتان، اشحاباد اپپاق كۇيگە ورانعان.

پرەزيدەنتتىڭ ەڭ سۇيىكتى ءتۇسى

تۇرىكمەن اقپارات قۇرالدارىندا جاريالانعان حابارلارعا سايكەس، تۇركىمەنستان استاناسى اشحابادتا 25-مامىر قالا كۇنى مەرەكەسىنە دەيىن قالاداعى كولىكتەردىڭ ءبارى اق تۇسكە بويالۋى كەرەك. سونداي-اق، ءتۇرلى اقپارات قۇرالدارى اق ءتۇستىڭ پرەزيدەنت گۋربانوگلۋ بەردىمۇحامەدوۆتىڭ جاقسى كورەتىن ءتۇسى ەكەنىن دە جازۋدا.

ءتۇرلى-ءتۇستى كولىككە ەلدىڭ بارلىق اۋماعىندا تىيىم سالىندى

نەگىزىنەن، اشحاباتتا ءتارتىپ ساقشىلارى جىل باسىنان بەرى قالادا تەك اق  ءتۇستى كولىكتەردىڭ قولدانىلۋىنا رۇقسات ەتكەن. اشحابادتىق كەيبىر تۇرعىندار ءتۇرلى-ءتۇستىى كولىكتەرىن ساتۋعا ءماجبۇر بولعان. بىراق، ولاردىڭ مۇنداي مۇمكىندىكتەرى دە قالمايتىن سىڭايلى. سەبەبى، ەندى، تەك ەل استاناسىندا ەمەس، تۇركىمەنستاننىڭ بارلىق ايماعىندا ءتۇرلى-ءتۇستى كولىككە رۇقسات جوق.

وسىنداي توتەننەن سالىنعان تىيىمعا بايلانىستى ەل تۇرعىندارى كولىكتەرىن اق تۇسكە بوياۋعا كوشكەندىكتەن، ەلدەگى بوياۋ قىزمەتىنىڭ دە باعاسى كۇرت وسكەن. ءبىر كولىكتى بوياتۋدىڭ ورتاشا قۇنى 18 مىڭ مانات، ياعني 5 مىڭ 143 دوللارعا تەڭ.

بۇدان بۇرىن دا سايتىمىزدا تۇركىمەنستاندا قىز-كەلىنشەكتەردىڭ كيىمدەرى مەن شاش ۇلگىلەرىنە، تىرناقتارىنا، جالپى سىرتقى كەلبەتتەرىنە قاتىستى زاڭ قابىلدانعانىن جازعان ەدىك. بىراق، تۇركىمەن باسشىسىنىڭ بۇل جولعى شەشىمى حالىقارالىق اقپارات قۇرالدارى ءۇشىن دە، ءبىز ءۇشىن دە تۇسىنىكسىز ءارى توسىنداۋ بولىپ تۇر...