كحدر وڭتۇستىك كورەيا ءۇشىن ساعاتتىق بەلدەۋىن وزگەرتتى

سولتۇستىك كورەيا ءوزىنىڭ ساعاتتىق بەلدەۋىنەن باس تارتىپ، وڭتۇستىككورەيالىق ۋاقىتقا قوسىلدى. بۇل تۋرالى كورەيانىڭ ورتالىق تەلەگراف اگەنتتىگى (KCNA) حابارلاعان.

اگەنتتىكتىڭ حابارلاۋىنشا، 5 مامىردان باستاپ، پحەنيان وڭتۇستىك كورەيانىڭ ساعاتتىق بەلدەۋىنە وتپەك. كورەي جارتى ارالىنىڭ وڭتۇستىك جانە سولتۇستىگىندەگى ۋاقىتتى بىرىزدىلىككە سالۋ ءۇشىن پحەنيان 5 مامىرعا 4 مامىر كۇنگى تۇنگى ساعات 23:00-دە، ياعني ءبىر ساعات بۇرىن ءوتىپ كەتكەن.

وزىندىك ساعاتتىق بەلدەۋدەن باس تارتۋ — بۇل كحدر مەن وڭتۇستىك كورەيا ليدەرلەرىنىڭ اراسىنداعى تاريحي سامميتتەن كەيىنگى العاشقى تاجىريبەلىك قادام دەسە بولادى. ەسكە سالايىق، 2015 جىلى سولتۇستىك كورەيا ەكىنشى دۇنيەجىزىلىك سوعىستىڭ اياقتالۋى مەن جاپونيادان ازاتتىق الۋىنىڭ قۇرمەتىنە وزىندىك ساعاتتىق بەلدەۋ قۇرعان بولاتىن.

27 ءساۋىر كۇنى قوس كورەيا پرەزيدەنتتەرىنىڭ ەكەۋارا كەزدەسۋلەرىندە ەكى ەل باسشىلارى بىردەي ساعاتتىق بەلدەۋگە ءوتۋ كەرەكتىگى تۋرالى ورتاق مامىلەگە كەلگەن ەدى. ەندى، سولتۇستىك كورەيا ءوز تاراپىنان العاشقى قادامىن جاساعانداي.

“The Qazaq Times”