"سامي ا" فوتو: BBC.

ۋساما بين لادەننىڭ وققاعارى دەپ تانىلعان تۋنيستىك ازامات 1997 جىلى گەرمانياعا قونىس اۋدارعان. گەرمانياداعى ۇلتشىلاردىڭ قولداۋىنا يە بولعان «گەرمانيا ءۇشىن التەرانتيۆا» پارتياسى «سامي ا» دەپ اتالاتىن بۇل ادام تۋرالى ماسەلەنى كوتەرە باستاعاندا، جەرگىلىكتى بيلىك ەرىكسىز ول تۋرالى مالىمەتتەردى، وعان قوسا ۇكىمەتتەن قانشا جاردەماقى الاتىنا تۋرالى مالىمەتتى تاراتتى. مالىمەتكە سايكەس ول گەرمانيا ۇكىمەتىنەن 1,168 ەۋرو جاردەماقى الادى.  بۇل تۋرالى BBC-ءدىڭ ونلاين قىزمەتى حابارلادى. 

گەرمانيا مەدياسى «سامي ا» دەگەن اتپەن بەلگىلى بۇل ادامنىڭ تولىق اتى-ءجونىن قاۋىپسىزدىك شارتتارىنا سايكەس اشىق جاريا ەتپەدى. «سامي ا» وسىعان دەيىن ءوزىنىڭ جيھاتشىلارعا قاتىسىنىڭ جوق ەكەنىن ايتىپ كەلەدى. گەرمانيا جاق ونىڭ قاۋىپسىزدىگىنە بايلانىستى دەپورتاتسيالاۋعا جول بەرمەيدى. سەبەبى، گەرمانيا ۇكىمەتى جيھاتشىلارمەن قاتىسى بار كەيبىر ادامداردى دەپورتاتسيالاعاننان كەيىن ءوز ەلىندە اۋىر قيناۋعا ۇشىراعانىن مالىمدەگەن.

ۋساما بين لادەن «ءال-كايدا» ۇيىمىنىڭ جەتەكشىسى جانە 2001 جىلعى «11 قىركۇيەك وقيعاسىن» ۇيىمداستىرۋشى دەپ تانىلعان. ونىڭ اقش-تىڭ ارنايى جاساعى پاكىستان جەرىندە 2011 جىلى اتىپ ولتىرگەن. اقش-تاعى تەررورلىق شابۋىلعا قاتىسۋشى ۇشقىشتار گەرمانيانىڭ گامبۋرگ قالاسىندا «ءال-كايدا» ۇيىمىنا قاراستى ورتالىقتا تاربيەلەنگەن دەگەن دەرەكتەر بار.

2005 جىلى تەررورلىق توپتىڭ جاقتاۋشىلارى قاتارىنداعى شەكتەلگەن ادامدار تىزىمىندە «سامي ا»، 2000 جىلدارى ۋساما بين لادەننىڭ وققاعارى دەپ تانىلعان. «سامي ا» گەرمانيا جەرىندە ءتورت بالاسى جانە ايەلىمەن بىرگە جاساپ كەلەدى. دەگەنمەن، قاۋىپسىزدىككە قاتەر توندىرگەنى ءۇشىن گەرمانيا پوليتسيا تاراۋلارى ونىڭ ەركىن ءجۇرىپ-تۇرۋىنا شەكتەۋ قويعان. ول ءار كۇنى پوليتسيا قىزمەتكەرلەرىنە جولىعىپ، ءىس-ارەكەتتەرى تۋرالى مالىمەت بەرىپ تۇرۋعا مىندەتتەلگەن.

“The Qazaq Times”