ەو لاۋازىمدىسى: اقش-قىتاي ساۋدا سوعىسىندا ەكەۋىندە قولدامايمىز

ەۋروپالىق وداقتىڭ ەكونوميكا ىستەرىنە جاۋاپتى جوعارى لاۋازىمدىسى، ەو تارابى اقش پەن قىتاي اراسىنداعى ساۋدا سوعىسىندا ەكى تاراپتىدا جاقتامايتىنىن ايتتى. وسىعان دەيىن، اقش-قىتاي ساۋدا قاقتىعىسىندا ەكى ەلدىڭ دە جوعارى لاۋازىمدىلارى ەو تارابىن وزدەرىنە قولداۋشى بولادى دەپ ۇمىتتەنگەن. بۇل تۋرالى «VOA» اقپاراتتىق سايتى حابارلادى.

ەۋروپالىق وداقتىڭ ەكونوميكالىق جانە قارجىلىق ماسەلەلەر جونىندەگى كوميسسارى پەر موسوۆيچي سەنبى كۇنى (21 ءساۋىر) «رەيتەر» اگەنتتىگىنە بەرگەن سۇحباتىندا: «ءبىر تاراپتى تاڭداۋ – ساۋدا قاقتىعىسىنا ارالاسۋ بولماق. بىراق بۇل تاعى ماسەلەنى شەشۋدىڭ جولى ەمەس. ارينە، ساۋدا تەڭسىزدىكتەرىن، باسقا دا ماسەلەلەردى شەشۋ كەرەك، الايدا بۇل ماسەلە قاقتىعىس ارقىلى شەشىلمەيدى»، – دەگەن پىكىرىن ورتاعا سالدى.

سوڭعى بىرنەشە اپتادا اقش-قىتاي اراسىندا جۇزدەگەن ميلليارد دوللار قۇنىنداعى ساۋدا داۋى تۋىلدى. ترامپ ۇكىمەتى قىتايدان يمپورت ەتىلەتىن تاۋارلارعا 150 ملرد اقش دوللارى كولەمىنە دەيىن يمپورتتىق تاريف ەنگىزەتىنىن مالىمدەدى. بۇل قىتايدىڭ ادىلەتسىز ساۋدا ساياساتىنا بەرگەن جاۋابى ەكەنىن ەسكەرتتى. بۇعان قارسى قىتايدا ءوز تارابىنان شارالار قولداندى. كەيىن قىتاي باسشىسى جاڭا ساۋدا ساياساتىن جاريا ەتىپ، ترامپ ۇكىمەتىنە جول بەرگەندەي بولدى.

پەر ءموسوۆيچيدىڭ ايتۋىنشا، قىتاي تارابى دا ءتيىستى رەفورمالاردى جۇزەگە اسىرۋى، اشىق ساۋدا ساياساتىن جولعا قويۋى، تاعى باسقا دا ماسەلەلەردى تۇبىرىمەن شەشۋىنە تۋرا كەلەدى. دەگەنمەن، بۇل ماسەلەلەردى ساۋدا سوعىسى ارقىلى ەمەس، دسۇ ارقىلى شەشۋى كەرەك.

وتكەن اپتادا، ترامپ اكىمشىلىگى دسۇ-عا قىتايدىڭ بولات، اليۋميني جانە بىرقاتار تاۋارلارىنا باعىتتالعان تاريفتەر تۋرالى كەلىسسوزدەر جۇرگىزۋگە كەلىستى.

اقش بولسا ەو-نىڭ ەڭ ۇلكەن ەكسپورت سەرىگى جانە ەكىنشى ءىرى يمپورت سەرىكتەسى. ال، قىتاي ەۋروپالىق وداقتىڭ يمپورتىنداعى ەڭ ۇلكەن سەرىگى، ەكسپورتىنداعى ەكىنشى ۇلكەن نارىعى. بۇدان سىرت، ادەتتە ەو اقش پەن قىتاي اراسىنداعى ساۋدا داۋىنا ارالاسقىسى كەلمەيدى. دەگەنمەن، ساراپشىلاردىڭ ايتۋىنشا، ەۋروپالىق وداق پەن امەريكا قۇراما شتاتتارى ءداستۇرلى ترانساتلانتيكالىق قاۋىپسىزدىكتىڭ ىنتىماقتاستىق قاتىناستارىنا يە. ەو-نىڭ كەيبىر مۇشە ەلدەرى قىتايدىڭ ساۋدا ساياساتىنا قارسى. ەۋرووداق تولىقتاي قىتاي ساۋدا ساياساتىن سىنعا الماعانىمەن، بىرقاتار مۇشەلەرى بۇل جاعىندا اقش قادامىن جاقتاپ وتىر.

“The Qazaq Times”