فوتو: gosnovosti.com

اقش قورعانىس مينيسترلىگى گيپەردىبىستىق زىمىران قۇراستىرۋعا 1 ميلرد دوللارعا جۋىق قارجى ءبولدى.

AFP اقپارات اگەنتتىگىنىڭ مالىمەتىنشە، اقش قورعانىس مينيسترلىگى گيپەردىبىستىق زىمىرانداردى قۇراستىرۋشى Lockheed Martin كومپانياسىنا 928 ميلليون دوللار قارجى بولگەن. پەنتاگون رەسمي وكىلدەرىنىڭ سوزىنشە، گيپەردىبىستىق زىمىران جاساۋعا بايلانىستى شەشىم شىعارۋعا رەسەي مەن قىتايدىڭ گيپەردىبىستىق زىمىراندار قۇراستىپ جاتقاندىعى سەبەپ بولعان.

اتالمىش ماسەلەگە بايلانىستى جۋرناليستەر الدىنا جاۋاپ بەرگەن اقش قورعانىس مينيسترلىگى وكىلدەرى: «ءدال قازىرگى جاعدايدا قىتاي گيپەردىبىستىق زىمىراندارىنا اقش اۋە قورعانىسى توتەپ بەرە المايدى. سەبەبى گيپەردىبىستىق زىمىرانداردى اۋە قورعانىسى رادارلارى تاپپايدى» - دەگەن.

قازىرگى تاڭدا الەمدە گيپەردىبىستىق زىمىراندارعا قارسى تۇرا الاتىن اۋە قورعانىسى قۇرىلعىلارى جوق. گيپەردىبىستىق زىمىران وزگە زىمىراندارمەن سالىستىرعاندا ۇشۋ باعىتىن وزگەرتە الادى. ول جىلدامدىعى مەن باعىت الماستىرۋى ارقىلى اۋە قورعانىس رادارلارىنا تۇسپەيدى. تۇسكەن كۇننىڭ وزىندە اۋە قورعانىسى ونى اتىپ ۇلگەرمەيدى.

“The Qazaq Times”