تەلەگرام رەسەيدەن قۋىلدى. فوتو: kazakbol.

رەسەيدىڭ حابار، بايلانىس تەحنولوگيالارىن باقىلاۋشى روسكومنادزور جەتەكشىسى الەكساندر جاروۆ مالىمدەمەسىندە، باقىلاۋشى ورىننىڭ Apple جانە Google كومپانياسىنان Telegram جەلىسىن ءوشىرۋدى تالاپ ەتكەن ەدى. ال، وتكەن اپتانىڭ سوڭىندا ماسكەۋدەگى سوت رەسەي فەدەراتسياسىنىڭ تەرريتورياسىندا Telegram جەلىسىن توقتاتۋعا شەشىم شىعاردى.

اتالعان ۇكىمدى ماسكەۋدەگى تاگان اۋداندىق سوتى شىعارعان. Telegram جەلىسى ۇستىنەن سوتقا جىبەرىلگەن ارىزعا، اتالعان الەۋمەتتىك جەلىنىڭ رەسەي فەدەرالدىق قاۋىپسىزدىك قىزمەتىنە تسيفرلى الگوريتمنىڭ كىلتىن بەرمەگەنى سەبەپ بولعان. ارىز بەرۋشى تاراپ اتالمىش روسكومنادزور.

BBC حابارىنا سەنسەك، بۇل شەشىم ماسكەۋ قالالىق سوتىندا دا كۇشىنە يە بولىپ قالماق. اتالعان الەۋمەتتىك جەلىنىڭ نەگىزىن سالۋشى پاۆەل دۋروۆ سوزىندە: «قولدانۋشىلاردىڭ قۇپياسى ساتىلمايدى. ادام قۇقىعى قورقىنىش پەن اشكوزدىكتىڭ الدىندا تاپتالماۋى كەرەك»، – دەگەن.

“The Qazaq Times”