ترامپ رەسەيدى ايىپتادى. فوتو: VAO.

كەشە اقش پرەزيدەنتى دونالد ترامپ اقش پەن رەسەي اراسىنداعى ديپلوماتيالىق جاعدايعا بايلانىستى ءوز پىكىرىن جاريا ەتتى. ول اقش-رەسەي قاتىناسى تاريحتاعى ەڭ تومەنگى دەڭگەيگە جەتكەنىن، ءتىپتى ەكى ەلدىڭ قازىرگى بايلانىسى «قىرعي قاباق سوعىس جىلدارىنداعى» دەڭگەيدەن دە تومەن ەكەنىن ايتتى. بۇل تۋرالى WSJ باسىلىمىنىڭ رەسمي سايتى جازدى.

اقش پرەزيدەنتى ءوزىنىڭ تۆيتتەر پاراقشاسىندا سۇرياداعى حيميالىق شابۋىلعا جاۋاپ رەتىندە زىمىران شابۋىلىن جاسايتىنىن مالىمدەگەن ەدى. بۇل مالىمدەمەدەن كەيىن ءسۇريا مەن رەسەي تارابى كىرپىدەي جيىرىلدى. رەسەي وسىعان دەيىن ءسۇريا جەرىندەگى رەسەيلىك كۇشتەرگە زىمىران شابۋىلى جاسالسا قارسى شابۋىل جاسايتىنىن ەسكەرتىپ كەلگەن. بۇل جولى ءسۇريا جەرىنە جاسالعان شابۋىلدىڭ كەز-كەلگەنى جاۋاپسىز قالمايتىنىن مالىمدەدى.

بۇل تۋرالى پرەزيدەنت ترامپ: «رەسەي ءسۇريا جەرىنە تۇسكەن كەز-كەلگەن زىمىرانعا قارسى تۇراتىنىن مالىمدەپ وتىر. وندا رەسەي دۇرىستاپ دايىندالىپ السىن، ولار كوپ ۇزاماي بارادى...»، – دەدى. ترامپ وعان قوسا ماسكەۋدىڭ باشار اسادقا قولداۋ كورسەتكەنىنە نارازىلىق بىلدىرە كەلىپ: «سىزدەرگە ۋلى گازدى قولداناتىن جانۋارمەن ىمىرالاسپاۋ  كەرەك ەدى.  ول ءوز حالقىن قىرىپ-جويىپ كەلەدى»، – دەدى.

ءسۇريا ماسەلەسى مەن حيميالىق شابۋىل اقش پەن رەسەي اراسىندا ونسىزدا سەتىنەپ تۇرعان قاتىناستى ءتىپتى دە ناشارلاتتى. سۇرياداعى رەسەي قارۋلى كۇشتەرى سوعىس دايىندىعىنا وتسە، اقش تارابى ابىر-سابىر كۇيگە ءتۇستى. دەگەنمەن، بۇگىن اق ءۇي تارابى زىمىران شابۋىلدارى تۋرالى سوڭعى شەشىم قابىلدانباعانىن مالىمدەدى.

“The Qazaq Times”