وڭتۇستىك قىتاي تەڭىزىندەگى جاساندى ارال. فوتو: WSJ.

اقش ۇكىمەتىنىڭ مالىمەتىنشە، قىتاي وڭتۇستىك قىتاي تەڭىزىندەگى سپراتلي (نانشا) ارالدارىنا بايلانىس جانە راديولوكاتسيالىق جۇيەلەرىمەن جابدىقتالعان اسكەري تۇراقتار ورناتقان. قۇراما شتات ۇكىمەتى بۇنى قىتايدىڭ وڭتۇستىك قىتاي تەڭىزىن ۇزدىكسىز ميليتاريزاتسيالاۋداعى ماڭىزدى قادام دەپ باعالاعان. بۇل تۋرالى VOA اقپاراتتىق سايتى حابارلادى.

سپراتلي شاعىن ارالدارىنا سالىنعان بۇل اسكەري بەكەتتەر قىتايدىڭ ايماقتاعى باقىلاۋ مەن يەلىك ەتۋ قۋاتىن نىعايتا تۇسپەك. ۋاشينگتوننىڭ  بۇل ىسكە نازار اۋدارۋىنىڭ سەبەبى، بۇل تەڭىز جانە اۋە بەكەتى اقش-تىڭ ايماقتاعى اسكەري وپەراتسيالارىنا ۇلكەن كەدەرگى كەلتىرەدى. ونىڭ ۇستىنە وڭتۇستىك قىتاي تەڭىزى الەمدەگى ەڭ ۇلكەن جۇك تاسىمالدارىنىڭ ءبىرى.

اقش لاۋازىمدىلارىنىڭ مالىمەتىنە قاراعاندا، قىتاي تەڭىز ارميا كۇشتەرى بۇل ايماقتا اسكەري جاتتىعۋ وتكىزۋگە دايىندالۋدا. بۇل اتالعان ايماقتاعى ەڭ ۇلكەن اسكەري جاتتىعۋ بولماق. جاتتىعۋعا قىتايدىڭ تەڭىز، اۋە جانە قۇرىلىق قارۋلى كۇشتەرى قاتىسادى.

اقش قورعانىس مينيسترلىگىنىڭ رەسمي وكىلى مالىمدەمەسىندە: «قىتاي تارابى سپراتلي ارالدارىنا تولىقتاي اسكەري جابدىقتارىن ورناتىپ بولدى. بۇل الداعى ۋاقىتتا وڭىردەگى اقش-تىڭ اسكەري قادامدارىنا ۇلكەن كەدەرگى»، – دەدى.

وتكەن ايدا اقش-تىڭ The Wall Street Journal باسىلىمى كوممەرتسيالىق سپۋتنيكتىك كومپانياسى تۇسىرگەن سۋرەتتەردى جاريا ەتكەن بولاتىن. سۋرەتتە جاساندى ارالدارعا ورناتىلعان كۇدىكتى نىساندار كورسەتىلگەن. قىتاي تارابى بۇل اۋماقتا 2014 جىلدان بەرى قاراي 7 جاساندى ارال جاساپ، اسكەري نىساندارعا پايدالانعان.

قىتاي قورعانىس مينيسترلىگى بۇل تۋرالى ءوز كوزقاراسىن بىلدىرگەن جوق.

“The Qazaq Times”