ساۋد ارابياسىنىڭ تاق مۇراگەرى مۇحاممەد بين سالمان. فوتو: worldbulletin.net

ساۋد-ارابياسىنىڭ حانزاداسى مۇحاممەد بين سالماننىڭ فرانتسياعا كەلۋى ەلدەگى يەمەندىكتەر مەن كوپتەگەن ادام قۇقىقتارى ۇيىمدارىنىڭ قارسىلىقتارىن وياتتى.

ءپاريجدىڭ اتاقتى تروكادەرو الاڭىندا جينالعان ءبىر توپ يەمەندىك فرانتسياعا كەلگەن سالماندى «يەمەننەن قولىڭدى تارت!» دەگەن ۇراندارمەن قارسى الدى. كوتەرىلىسشىلەر يراننىڭ قولداۋىنداعى حۇسيتتەرگە قارسى اۋە شابۋىلدارىن ۇيىمداستىرعان ساۋد-ارابياسىنان وسى شابۋىلدارعا نۇكتە قويۋىن تالاپ ەتتى.

ءبىر تۇستان ورتاق مالىمدەمە جاساعان ادام قۇقىقتارى جونىندەگى 10 ۇيىم سالماننان دەرەۋ اۋە شالبۋىلدارى مەن گۋمانيتارلىق داعدارىستى ۋشىقتىرۋشى بلوكاداعا نۇكتە قويۋىن سۇرادى.

ادام قۇقىقتارى جونىندەگى ۇيىمدار فرانتسيانىڭ ساۋد-ارابياسىنا قارۋ ساتقانىن دا سىنعا الدى. ساۋد ارابياسى مەن ءباا حۇسيتتەردىڭ 2015 جىلى باستاعان كوتەرىلىستەرىنە قارسى پرەمەر-مينيستر مانسۇر حاديگە قولداۋ كورسەتىپ، ولارعا قارسى اۋە شابۋىلدارىن باستاعان ەدى. ال، بۇۇ يەمەندەگى وسى قاقتىعىستاردا 2015 جىلدان بەرى 10 مىڭ ادامنىڭ قازا تاپقانى تۋرالى حابارلادى.

“The Qazaq Times”