فوتو: ca-news.org

وڭتۇستىك كورەيانىڭ بۇرىنعى پرەزيدەنتى پاك كىن حەگە 18 ملرد. ۆون (شامامەن 17,5 ملن. دوللار) ايىپپۇل سالىنىپ، ءارى سىرتتاي 24 جىل باس بوستاندىعىنان ايىرۋعا ۇكىم شىعارىلدى. بۇل تۋرالى «Yonhap» اگەنتتىگى سەۋلدىڭ ورتالىق اۋداندىق سوتىنىڭ رەسمي اقپاراتى بويىنشا حابارلايدى.

سوت پاك كىن حەنىڭ موينىنا ىلىنگەن مەملەكەتتىك قۇپيانى جاريالاۋ، بوپسالاۋ، پارا الۋ جانە قىزمەتىن اسىرا پايدالانۋ سىندى بىرقاتار ايىپتاۋلار نەگىزىندە وتكەن. الايدا، وڭتۇستىككورەيالىق بۇرىنعى پرەزيدەنت بۇلاردىڭ بارلىعىن جوققا شىعارۋدا. وڭتۇستىك كورەيا پروكۋراتۋراسى 66 جاستاعى ەكس-پرەزيدەنتتى 30 جىل باس بوستاندىعىنان ايىرۋدى سۇراعان.

نەگىزىندە، پاك كىن حەگە قاتىستى جەمقورلىققا بايلانىستى داۋ 2016 جىلى باستالعان. تەرگەۋ ناتيجەلەرى بويىنشا، پاك كىن حەنىڭ جاقىن قۇربىسى چحۆە سۋن سيل، ەكس-پرەزيدەنتپەن اراداعى دوستىعىن پايدالانا وتىرىپ، Samsung جانە Lotte سياقتى ءىرى كورپوراتسيالاردان اقشا بوپسالاعان.  2016 جىلدىڭ سوڭىندا كورەيا پارلامەنتى پاك كىن حەنى سوتقا تارتىپ، 2017 جىلدىڭ ساۋىرىندە وعان ايىپتاۋلار تاعىلعان. ال ونىڭ قۇربىسى چحۆە سۋن سيل 2018 جىلدىڭ اقپان ايىندا 20 جىلعا جەمقورلىق پەن مەملەكەتتىك ىستەرگە ارالاستى دەگەن ايىپتاۋلارمەن باس بوستاندىعىنان ايىرىلعان. ول سونىمەن قاتار 16.6 ملن. دوللار ايىپپۇل تولەۋگە مىندەتتەلگەن.

“The Qazaq Times”