تۇركىمەنستان كيىم-كەشەككە قاتىستى قاتاڭ تىيىم ەنگىزدى

تۇركىمەنستان كەدەنى ەل توڭىرەگىنە ايەلدەرگە ارنالعان شومىلۋ كيىمى مەن شولاق شالبار (شورتى) اكەلۋگە تىيىم سالدى.

بۇل تۋرالى حابارلاعان تۇركىمەنستاننىڭ "ازاتتىق" راديوسى، قازىرگى ۋاقىتتا جەكەمەنشىك دۇكەندەر اتالعان تىيىم شاراسى ەنگىزىلمەي تۇرىپ كەدەننەن وتكەن تاۋارلاردى (شورتى، شومىلۋ كيىمدەرى) جاپپاي ساتىلىمعا شىعارۋدا. "كەدەن ايماعىندا اتالعان تاۋارلاردىڭ تۇركىمەن تەرريتورياسىنا وتكىزىلمەۋى قاتاڭ باقىلاۋعا الىنۋدا. نەگىزىندە، جاز مەزگىلىنىڭ جاقىنداۋىنا بايلانىستى سونداي كيىمدەرگە دەگەن سۇرانىس تا ارتۋدا. بىراق كەدەنشىلەر مۇنداي تىيىمنىڭ ناقتى سەبەبىن ايتپاۋدا" ، - دەيدى "ازاتتىق تۇرىكمەن" ءتىلشىسى. تۇركىمەنستان باسىلىمدارىنىڭ وسىعان قاتىستى حابارلارىندا سوڭعى جىلدارى جاز مەزگىلىندە ايەلدەر اراسىندا دا، ەرلەر اراسىندا دا شولاق شالبار سانگە اينالعانى تالقىلانۋدا. ەندى تۇركىمەندەرگە تۇرىكمەنستاننىڭ جازعى 50 گرادۋسقا دەيىنگى قاپىرىق اۋا رايى جاعدايىنا ىڭعايلى كيىمدەرىنەن باس تارتۋلارىنا تۋرا كەلمەك.

نەگىزىندە، بۇل سوڭعى اپتادا تۇركىمەنستاندا كيىم-كەشەك پەن سىرتقى كەلبەتكە قاتىستى ەنگىزىلگەن ءبىر عانا تىيىم ەمەس. ناۋرىز ايىنىڭ سوڭىندا اشحابادتاعى مەملەكەتتىك قىزمەتكەرلەرگە تىرناقتارى مەن كىرپىكتەرىن ءوسىرىپ، بوياۋعا، شاشتارىنىڭ تۇستەرىن وزگەرتۋگە، سونىمەن قاتار، التىن اشەكەيلەر تاعىنۋعا تىيىم سالىنعان ەدى. تۇركىمەنستان كەدەنى اشىق ءتۇستى شاش بوياۋلارىن، سونداي-اق شاشتى مەليرلەۋ مەن تۇسسىزدەندىرۋگە ارنالعان زاتتاردى ەل تەرريتورياسىنا وتكىزبەي قويعان بولاتىن.

“The Qazaq Times”