تۇركيا ۇكىمەتى شەتەلگە قاشقان گۇلەنشىلەردى كۇشپەن ەلگە قايتارۋدا

تۇركيا قاۋىپسىزدىك ورگاندارى مالىمدەمە جاساپ، 2016 جىلعى ءساتسىز اياقتالعان توڭكەرىسكە قاتىسى بار دەلىنگەن 80 ادامدى شەتەلدەردەن ۇستاپ اكەلگەنىن حابارلادى. مالىمەتكە قاراعاندا بۇل 80 ادامدى 18 ەلدەن تۇركياعا قايتارعان. بۇل تۋرالى BBC-ءدىڭ ونلاين قىزمەتى حابارلاعان بولاتىن.

بۇل وپەراتسيا بارىسىندا انكارا بيلىگى بىرقاتار ەلدەرمەن «رەنجىسىپ» تە قالدى. ايتالىق، ەندى عانا جاقسارا باستاعان تۇركيا-گرەكيا ديپلوماتياسى قايتادان كەدەرگىلەرگە تاپ بولدى. سەبەبى، گرەكيا سوتى توڭكەرىسكە قاتىسى بار دەلىنگەن ازاماتتاردى قاماۋ جازاسىنا كەسكەنىمەن، تۇركياعا قايتارۋ تالابىن ماقۇلداماي تاستادى.

ءبىر اپتا بۇرىن كوسوۆو پرەمەر-ءمينيسترى تۇركيا ارنايى قىزمەتىنە ماڭىزدى اقپاراتتاردى بەرگەنى ءۇشىن، سىرتقى ىستەر ءمينيسترى مەن ارنايى قىزمەتتىڭ باسشىسىن جۇمىستان قۋعان ەدى. بۇعان تۇركيا پرەزيدەنتى پىكىر ءبىلدىرىپ: «كوسوۆو توڭكەرىسكە قاتىسۋشىلاردى قورعاپ وتىر»، – دەگەن بولاتىن. دەگەنمەن، تۇركيا ارنايى قىزمەتى كوسوۆودان توڭكەرىسكە قاتىسى بار دەپ تاپقان ادامداردى كۇشپەن الىپ كەتكەن. ونىڭ ىشىندە فەتحۋللاح گۇلەنگە قاتىسى بار دەلىنگەن وقۋ ورىننىڭ 5 وقىتۋشىسى دا بار. الايدا، ولار توڭكەرىسكە قاتىسقان دەگەن ايىپتى تەرىسكە شىعارعان.

تۇركيادا 2016 جىلعى 16 شىلدە كۇنى اسكەري توڭكەرىس ارەكەتى بولدى. ەل پرەزيدەنتى رەجەپ تايىپ ەردوعان بۇل ارەكەتتى ۇيىمداستىرۋشى رەتىندە  تەرروريست دەپ تانىلعان فەتحۋللاح گۇلەندى ايىپتاعان بولاتىن. انكارا بيلىگىنىڭ اقش-تا تۇراتىن گۇلەندى ەلگە قايتارۋ تۋرالى جاساعان ارەكەتتەرى ءالى دە جۇزەگە اسپاي كەلەدى.

“The Qazaq Times”