كاۆالاعا اراشا تۇسكەن ەلشىلەر ەلدەن شىعارىلۋى مۇمكىن. فوتو: كريزيس.رۋ

تۇركيا بيلىگى ەلىندەگى باتىستىق 10 ەلدىڭ ەلشىسىن «جاعىمسىز ادامدار» دەپ جاريالاپ، ەلدەن شىعارۋى مۇمكىن. پرەزيدەنت رەجەپ تايىپ ەردوعان سەنبى كۇنى (23 قازان) سىرتقى ىستەر مينيسترلىگىنە وسىنداي بۇيرىق بەرگەنىن مالىمدەدى. وسىدان بۇرىن 10 ەلدىڭ ەلشىسى مەتسەنات وسمان كاۆالانى بوساتۋعا شاقىرعان بولاتىن.

4 جىلدان بەرى قاماۋدا وتىرعان وسمان كاۆالاعا 2013 جىلعى ۇلتتىق نارازىلىق اكتسياسىن قارجىلاندىردى جانە 2016 جىلعى اسكەري توڭكەرىستى ۇيىمداستىردى دەگەن ايىپتار تاعىلعان. 18 قازاندا اقش، كانادا، فرانتسيا جانە گەرمانيا ەلشىلەرىن قامتىعان باتىستىق 10 ەلدىڭ ەلشىسى بىرلەسكەن مالىمدەمە جاساپ، كاۆالا ءىسىنىڭ ءادىل ءارى جەدەل قارالۋىن، سونداي-اق  تەز ارادا بوساتۋىن سۇراعان ەدى.

10 ەلشىنىڭ بىرلەسكەن مالىمدەمەسىنەن كەيىن تۇركيا ءسىم تارابى ولاردى شاقىرىپ تالاپتارىنا جاۋاپ بەرە المايتىنىن جەتكىزگەن.

«مەن سىرتقى ىستەر مينيسترلىگىنە نە ىستەۋ كەرەكتىگىن ايتتىم، – دەدى ەردوعان ەسكىشەحيردەگى سوزىندە، –  بۇل 10 ەلشى بىردەن «جاعىمسىز تۇلعالار» دەپ جاريالانۋى كەرەك. بۇنى تەز ارادا جاساۋ كەرەك. ولار تۇركيانى تۇسىنەتىن بولادى. ولار تۇركيانى تۇسىنبەسە وزدەرىنىڭ ەلدەن كەتەتىنىن دە تۇسىنبەيدى»، – دەدى تۇركيا پرەزيدەنتى.

اقش، گەرمانيا جانە فرانتسيا تارابى بۇل جاعدايعا بايلانىستى قازىرگە رەسمي پىكىر جاريالاعان جوق.

The Qazaq Times