تۇركيا، رەسەي جانە يران باسشىلارى انكارادا ءسۇريا ماسەلەسىن تالقىلادى

بۇگىن تۇركيانىڭ ورتالىق قالاسى انكارادا تۇركيا، رەسەي جانە يران ەلدەرىنىڭ باسشىلارى باس قوسپاق. كەزدەسۋدىڭ باستى تاقىرىبى ءسۇريا ماسەلەسى، ونداعى ساياسي شەشىمدەر تۋرالى بولادى دەپ حابارلاۋدا تۇرىك اقپارات قۇرالدارى.

رەسەي پرەزيدەنتى ۆلاديمير پۋتين مەن يران پرەزيدەنتى حاسان رۋحاني انكاراعا بارىپ، تۇركيا باسشىسى ەردوعانمەن بىرگە ءۇش جاقتى كەزدەسۋ وتكىزبەك. كەزدەسۋدە ءسۇريانىڭ تەرريتوريالىق تۇتاستىعى، استانا پروتسەسىنىڭ جالعاسۋى، قاقتىعىسسىز ايماقتاردى تۇراقتاندىرۋ، وعان قوسا ماڭىزدى ساياسي شەشىمدەر مەن تەرروريزمگە قارسى كۇرەس تاقىرىپتارى تالقىلانباق.

تۇركيانىڭ «انادولى» اقپاراتتىق اگەنتتىگىنىڭ حابارىنا قاراعاندا، ءۇش جاقتى كەزدەسۋدەن ءبىر كۇنى بۇرىن تۇركيا مەن رەسەي اراسىندا جوعارى دەڭگەيدەگى ىنتىماقتاستىق كەڭەسىنىڭ 7-ءشى وتىرىسى انكارادا بولىپ وتكەن. ەكى ەل باسشىلارى تۇركيا مەن رەسەي اراسىنداعى قارىم-قاتىناستى اۋقىمدى تۇردە كەڭەيتۋ تۋرالى بىرقاتار كەلىسىمگە كەلگەن. بۇل تۋرالى حابارلارعا قاراعاندا، ەردوعان مەن پۋتين ەكونوميكالىق بايلانىستى تەرەڭدەتۋ، «تۇرىك اعىنى» ەكونوميكالىق جوباسى، اككۋيۋ اتوم ستانساسى جانە S-400 زىمىرانعا قارسى قورعانىس جۇيەسىن ساتۋ-ساتىپ الۋ ماسەلەلەرى تالقىلاعان. ەكى ەل پرەزيدەنتى اككۋيۋ اتوم ەلەكتر-ستانساسىنىڭ ىرگەتاسىن قالاۋ راسىمىنە قاتىسقان.

“The Qazaq Times”