قىتايدىڭ عارىش كەمەسى اقىرى «قۇلادى»

وسىدان بىرنەشە كۇن بۇرىن الەمدىك عارىش سالاسىنىڭ زەرتتەۋشىلەرى مەن قىتاي عارىش سالاسىنىنىڭ ماماندارى 2011 جىلى قىركۇيەك ايىندا وربيتاعا ۇشىرىلعان  "Tiangong-1" اتتى عارىش كەمەسىنىڭ 30 ناۋرىز بەن 3 ءساۋىر ارالىعىندا جەرگە قۇلايتىنىن حابارلاعانى تۋرالى جازعانبىز. ەندى، قىتايلىق "شينحۋا" اقپارات اگەنتتىگى تاراتقان حابارعا قاراعاندا، اتالعان عارىش كەمەسىنىڭ بۇگىن ساعات 00:15-تە (استانا ۋاقىتىمەن) جەرگە "قايتقاندىعى" جانە ونىڭ اۋقىمدى بولشەگىنىڭ جەردىڭ اتموسفەرا قاباتىنا وتەر-وتپەس ورتەنىپ، ال قالعان بولشەگىنىڭ تىنىق مۇحيتىنىڭ وڭتۇستىگىنە قۇلاعانى بەلگىلى بولدى.

"Tiangong-1"-عارىش كەمەسى جەرگە قىتاي عارىشتىق ينجەنەرلىك بيۋروسى (CMSEO) جاساعان بولجامعا سايكەس، دۇيسەنبى تاڭ الدىندا "ورالۋى" ءتيىس ەدى.  ۇزىندىعى 10 مەتر، سالماعى 8 توننا بولاتىن "Tiangong-1" بۇعان دەيىنگى عارىش كەمەلەرىنەن الدەقايدا ۇلكەن ەكەن.  وسىدان ەكى جىل بۇرىن، ياعني 2016 جىلى بەيجىڭ بيلىگى اتالعان عارىش كەمەسىنەن كوز جازىپ قالعانىن ايتىپ، بۇل تۋرالى بۇۇ-نا حابار بەرگەن ەدى. ماماندار ونىڭ جەرگە قاراي باعىت العانىن دا جاسىرمادى. ال "امەريكالىق عارىشتىق باقىلاۋ جەلىسى" اسا قاتتى جىلدامدىقپەن جەر بەتىنە قاراي قۇلديلاي باستاعان "Tiangong-1"-ءدىڭ 43 سولتۇستىك جانە 43 وڭتۇستىك ەندىك اراسىنداعى ايماققا قۇلاۋى مۇمكىن ەكەندىگىن ايتىپ، رەسمي مالىمدەمە جاساعان بولاتىن. وسى بولجامعا قاتتى الاڭداعان بىرقاتار ەل تۇرعىندارى، ەندى قاۋىپتەن قۇتىلدى.

“The Qazaq Times”