وڭتۇستىك كورەيانىڭ اۋە كۇشتەرى اقش-قا تاپسىرىس بەرگەن F-35A سوعىس ۇشاعىن تاپسىرىپ الدى. وڭتۇستىك كورەيا رەسميلەرىنىڭ مالىمدەۋىنشە، كورەيانىڭ F-35 بەسىنشى ۇرپاق سوعىس ۇشاقتارىنا يە بولۋى ناقتى اسكەري الەۋەتىن ارتتىرىپ قانا قويماي، ماڭىزدى سيمۆولدىق مانگە دە يە بولدى. بۇل تۋرالى «شينلاڭ» اقپاراتتىق سايتى حابارلادى.

F-35 ۇشاعى – الەمدەگى ەڭ وزىق سوعىس تەحنيكاسىنىڭ ءبىرى. اتالعان ۇشاقتىڭ 5-ءشى ۇرپاق جاڭا تۇرلەرى ورنىنان تىك كوتەرىلىپ ۇشۋ، اۋەدە اينالۋ، لەزدە كەرى باعىتقا ۇشۋ، جەدەل شابۋىلداۋ، ت.ب. تولىپ جاتقان مۇمكىندىكتەرگە يە. ۇشۋ قارقىنى جاعىنان دا وعان تەڭدەس سوعىس ۇشاقتارى كەمدە كەم. اقش بۇل ۇشاقتارىن الەمدە تەك يزرايل مەن وڭتۇستىك كورەياعا عانا ساتىپ بەرگەن.

F-35A ۇشاقتارىن وتكىزىپ بەرۋ جانە قابىلداپ الۋ سالتاناتتى شاراسىنا وڭتۇستىك كورەيانىڭ پارلامەنت وكىلدەرى، اۋە قورعانىس كۇشتەرىنىڭ لاۋازىمدىلارى جانە پەنتاگون لاۋازىمدىلارى قاتىستى. اقش قورعانىس مينيسترلىگىنىڭ اسكەري قارۋ-جاراق ساتۋ-ساتىپ الۋ ىسىنە جاۋاپتى ەللەن رودس سوزىندە: «F-35 جاۋىنگەرلىك ۇشاعى وڭتۇستىك كورەيانىڭ اسكەري-اۋە كۇشتەرىنىڭ قۋاتىن ارتتىرۋعا ايتارلىقتاي ىقپال ەتەدى. وعان قوسا، ەكى تاراپتىڭ اسكەري سالاداعى ىنتىماقتاستىعىن بەكەمدەي تۇسەدى»، – دەدى.

وڭتۇستىك كورەيا اۋە كۇشتەرىنىڭ مالىمدەۋىنشە، اقش-تىڭ وڭتۇستىك كورەياداعى اۋە كۇشتەرى F-35 ۇشاقتارىن پايدالانادى. ال، وڭتۇستىك كورەيانىڭ دا مۇنداي تيپتەگى ۇشاقتارعا قول جەتكىزۋى ەكى ەلدىڭ بىرلەسكەن اۋە وپەراتسيالارىنىڭ الەۋەتىن ارتتىرا تۇسەدى. ەكى ەلدىڭ اۋە كۇشتەرىن تۇتاس جۇيەگە كەلتىرەدى.

وڭتۇستىك كورەيانىڭ اۋە كۇشتەرى F-35A ۇشاقتارىن الدىمەن اسكەري جاتتىعۋعا پايدالانادى. 2019 جىلى ەلدىڭ اۋە كۇشتەرىنە رەسمي تۇردە پايدالانۋعا بەرەدى.

“The Qazaq Times”