رەسەيدىڭ تەرگەۋ كوميتەتى «كەمەروۆتەگى ءورت اپاتىندا 300 ادام قازا بولدى» دەگەن حاباردى تاراتقان تەلەفون پرانكەرىنە (تەلەفون سودىرى)  قىلمىستىق ءىس قوزعادى. اتالعان كوميتەتتىڭ مالىمەتىنە قاراعاندا، كەمەروۆتەگى ورتتە قازا بولعان ادامدار سانى تۋرالى ماقساتتى تۇردە جالعان اقپارات تاراتتى دەپ ۋكراينالىق ەۆگەني ۆولنوۆ اتتى ازاماتتى ايىپتاعان. بۇل تۋرالى BBC حابارلادى.

رەسەي تەرگەۋ كوميتەتى مالىمدەمەسىندە: «ۆولنوۆ كەمەروۆ قالاسىنداعى ساۋدا ورتالىعىندا ءورت بولعان كەزدە، ءوزىن توتەنشە جاعدايلار مينيسترلىگىنىڭ وكىلى رەتىندە تانىستىرىپ، مەملەكەتتىك مەكەمەلەرگە قوڭىراۋ شالعان جانە اتالعان ساۋدا ورتالىعىنداعى ورتتە 300 ادام قازا بولدى دەگەن جالعان اقپارات تاراتتى»، – دەلىنگەن.

مالىمەتتەرگە قاراعاندا ەۆگەني ۆولنوۆتىڭ YouTube كانالىندا پاراقشاسى بولعان. ونىڭ YouTube-تەگى پاراقشاسىنا جۇكتەگەن بۇل تەلەفونداعى سويلەسۋ ەستەلىگى 340 مىڭ كورىلىم سانىن جيناپ ۇلگىرگەن. تەرگەۋ كوميتەتىنىڭ مالىمەتىندە، ۆولنوۆ مايىتحاناعا قوڭىراۋ شالىپ: «قانشا بوس ورىن بار، قازىر 300-دەي ادامدى الىپ كەلۋى مۇمكىن»، – دەگەن. كوميتەت ۆولنوۆقا «جاقىندارىنان ايىرىلعان ادامداردى الجاستىرىپ، تارتىپسىزدىك ورناتۋدى ماقسات ەتكەن» دەگەن ايىپ تاعىپ وتىر.

ەۆگەني ۆولنوۆتىڭ تاراتقان مالىمەتى قىسقا ۋاقىتتا الەۋمەتتىك جەلىدە كەڭ تاراپ كەتكەن. كەمەروۆ قالاسىنداعى نارازىلىق شاراسىندا دا تۇرعىندار قازا بولعانداردىڭ ناقتى سانىن جاريا ەتۋدى تالاپ ەتكەن. كەشە تاڭەرتەڭ رەسەيدىڭ توتەنشە جاعدايلار مينيسترلىگى اپاتتى جاعدايدا 64 ادامنىڭ قازا تاپقانىن مالىمدەدى. ونىڭ ىشىندە 41 بالانىڭ بار ەكەنىن راستادى.

“The Qazaq Times”