باشار اساد رەجيمى بۇل جولى ادەتتەگىدەن دە ەرسىلەۋ قادام جاسادى. حالىقارالىق اقپارات قۇرالدارى شىعىس گۋتادا اسادتى ماداقتاۋشىلارعا عانا ازىق-تۇلىك پەن سۋ تاراتىلعانى تۋرالى حابارلاۋدا.

ونسىز دا بىرنەشە ايدان بەرى حالقى زورلىق-زومبىلىققا ۇشىراپ جاتقان شىعىس گۋتاداعى قولعا وتكەن ايماقتاردا اسادتى ماقتاپ-ماداقتاعاندارعا عانا ازىق-تۇلىك پەن ىشەر سۋ تاراتىلىپ جاتقاندىعىنا قاتىستى عالامتور بەتىندە بەينە-كورىنىستەر پايدا بولدى. بۇل تۋرالى "yeniakit.com " ءوز سايتىندا جاريالادى.

اساد رەجيمىنە جاقتاس سۇريالىق دەپۋتات مۇحاممەد كانباد تا توبە كورسەتكەن بەينەجازبادا تۇرعىندارعا ازىق-تۇلىك پەن سۋ تاراتىلىپ جاتقاندىعى بايقالادى. اتالعان بەينەكورىنىسكە ونىڭ: "اساد ءۇشىن قول شاپاتتاپ، ۇرانداتپاعاندارعا سۋ دا جوق، تاماق تا جوق"  دەپ تۇرعان ءساتى جازىلىپ قالعان. سول بەينەكورىنىستە وزەك جالعار ەشتەڭە تاپپاعان شىعىس گۋتا حالقىنىڭ ەرىكسىز: "قانىمىز دا، جانىمىز دا ساعان قۇربان، اساد!", "باسشىمىز — اساد!" دەگەن ماندەگى ۇراندار تاستاپ، اسادتىڭ اتىن ۇرانداتىپ قانا اس-سۋعا قول جەتكىزگەندەرى انىق بايقالادى.

كەيىننەن، جەرگىلىكتى تەلەارنادا ءسوز العان كانباد ءوزىنىڭ بۇل قىلىعىنا قاتىستى: "حالىق پەن اسكەر ونسىز دا اساد ءۇشىن ۇرانداتىپ جاتقان-دى" ، - دەپ اقتالدى.

“The Qazaq Times”