افرين ازات ەتىلىپ، مەكتەپتەر قايتا اشىلدى

ءسۇريانىڭ افرين قالاسىنا قاراستى ءال-دجاۆيز اۋىلىندا "كۇردتەردىڭ حالىقتىق قورعاۋ وتريادى" (YPG) ۇيىمىنىڭ كەسىرىنەن مەكتەپكە بارا الماعان بالالار ء"زايتۇن بۇتاعى" وپەراتسياسى ارقىلى ايماقتىڭ تەرروردان تازارتىلۋىنا بايلانىستى ەكى جىلعا جۋىق ۇزىلىستەن كەيىن قايتادان مەكتەپ تابالدىرىعىن اتتادى.

تۇركيا قارۋلى كۇشتەرى جۇرگىزگەن وپەراتسيانىڭ ارقاسىندا تەررورلىق ۇيىمنان قۇتقارىلعان ءسۇريانىڭ افرين ايماعىنداعى مەكتەپتەر قايتا جوندەلۋدە. سونىڭ ىشىندە، ءال-دجاۆيز اۋىلىنداعى 160 ورىندىق مەكتەپ تە پارتا، تاقتا جانە بالالار الاڭى سياقتى قاجەتتى قۇرالدارمەن جادبىقتالدى. قۇتقارۋشى توپ تەك بالالاردى عانا ەمەس، سونىمەن قاتار مەكتەپ ۇستازدارىن دا كەڭسە تاۋارلارى جانە كيىم-كەشەكپەن قامتاماسىز ەتتى.

سونشاما جىل ۇزىلىستەن كەيىن قوڭىراۋ داۋىسى ەستىلگەن مەكتەپ الاڭىندا سۇريالىق وقۋشىلار وزدەرىنە جاسالعان جاقسىلىقتىڭ قارىمتاسى رەتىندە تۇركيا جالاۋلارىن جەلبىرەتۋدە.

مەكتەپ وقىتۋشىلارىنىڭ ءبىرى ۋداي يبراھيم ۇيىمنىڭ بۇل ايماقتا اراب ءالىپبيىنىڭ ورنىنا لاتىن ءالىپبيىن ماجبۇرلەپ وقىتۋعا تىرىسقاندارىن، وسىعان بايلانىستى بالالار مەن اتا-انالاردىڭ قيىن جاعدايدا قالعاندىقتارىن ايتىپ: "بۇل جاعداي افريندەگى وزگە دە وقۋ ورتالىقتارىنىڭ دا باسىندا بار. "كۇردتەردىڭ حالىقتىق قورعاۋ وتريادى" (YPG) ۇيىمىنىڭ كەسىرىنەن بالالار ساباقتان قول ءۇزدى. ولار بالالارعا ارابشا ەمەس، كۇرد تىلىندە ءبىلىم بەرۋگە تىرىستى. ەسكى ءداستۇردى بۇزىپ، الىپبيگە دەيىن وزگەرتىپ، بالالارعا مۇلدەم باسقا نارسەلەر ۇيرەتپەكشى بولدى. سوندىقتان اراب ۇلتىنان تۇراتىن اۋىل حالقى بالالارىن مەكتەپكە جىبەرمەي قويعان ەدى. تۇركيا بۇل جەردى تەررورلاردان تازارتتى، ولارعا ريزاشىلىعىمىز شەكسىز" ، - دەدى.

“The Qazaq Times”