فرانتسياداعى تەررورلىق شابۋىلعا دايش-تىڭ قاتىسى بولۋى مۇمكىن

فرانتسيانىڭ وڭتۇستىگىندەگى ترەبەس قالاسىندا قارۋلى شابۋىل ورىن الىپ، ناتيجەسىندە ءۇش ادام اجال قۇشىپ، 16 ادام جارالانعان. "Reuters" اگەنتتىگى سۋپەرماركەتكە تۇتقيىلدان شابۋىل جاساعان ءبىر عانا قارۋلى تەرروريست تاراپىنان جۇزەگە اسىرىلعان وقيعاعا دايش-تىڭ ارەكەتى دەپ باعا بەرۋدە.

جالعىز ءوزى بولعانىنا قاراماستان، ءتارتىپ ساقشىلارىنىڭ قۇرىعىنا بوي بەرمەگەن تەرروريست، الدىمەن سۋپەرماركەتتەگى ادامداردىڭ بارلىعىن كەپىلگە العان. فرانتسيا ىشكى ىستەر مينيسترلىگى بەرگەن مالىمەتكە سايكەس، قىلمىس جاساعان تەرروريست ءۇش جىل بۇرىن پاريجدە 129 ادامنىڭ ءومىرىن جالماعان شابۋىلدى ۇيىمداستىرعانداردىڭ ءبىرى سالاح ابدەسسەلامنىڭ بوستاندىققا شىعارىلۋىن تالاپ ەتكەن. وسىعان قاراعاندا، اتالعان وقيعا تۋرالى ءالى ناقتى رەسمي مالىمەت بولماسا دا، بۇل جولعى كۇدىكتىنىڭ دە سالاح ابدەسسەلامنىڭ سىبايلاسى، ياعني دايش مۇشەسى ەكەندىگىنە كۇمان جوق.

پاريج باس پروكۋرورى فرانتسۋا مولينس، باق وكىلدەرىنە بەرگەن مالىمدەمەسىندە:

"شابۋىل جاساۋشى "Super U" اتتى دۇكەنگە "اللاحۋ اكبار" دەپ ايقايلاپ كىرگەن. ءسويتىپ ول ءوزىنىڭ دايش-تىڭ اسكەرى ەكەندىگىن جانە ءسۇريا ءۇشىن جانىن بەرۋگە دايىن ەكەنىن ايتتى" ، - دەسە دە، فرانتسيا بيلىگى وقيعا بولعان جەردە ولتىرىلگەن شابۋىلشى مەن دايش اراسىنداعى بايلانىستىڭ ءالى ناقتى انىقتالماعانىن ايتۋدا.

“The Qazaq Times”