ترامپ جانە كيم جوڭ ۋن. فوتو: telam.com.ar.

شۆەتسيا سىرتقى ىستەر مينيسترلىگىنىڭ كەشە جاساعان مالىمدەمەسىندە، سولتۇستىك كورەيا جوعارى لاۋازىمدىلارىنىڭ ءبىرى سول كۇنى كەشتە ستوكگولمگە بارىپ، سول ەلدەگى ەكى كۇندىك رەسمي ساپارىن باستايتىنى ايتىلعان. بۇل ءىس اقش پرەزيدەنتى مەن كحدر باسشىسىنىڭ كەزدەسۋىنە جول اشۋى مۇمكىن دەپ قارايدى WJS باسىلىمى.

شۆەتسيا ءسىم-ءىنىڭ مالىمدەمەسىندە: «سولتۇستىك كورەيانىڭ ءسىم باسشىسى ري يوڭ حو (Ri Yong Ho) بەيسەنبى جانە جۇما كۇندەرى شۆەتسيادا رەسمي ساپاردا بولادى جانە شۆەتسيا سىرتقى ىستەر ءمينيسترى مارگوت ۋالستروممەن كەزدەسۋ وتكىزەدى»،–  دەلىنگەن. شۆەتسيا ءسىم وكىلى ەكى ەل لاۋازىمدىلارى سوڭعى كەزدەگى ىنتىماقتاستىق قادامدارىن جەدەلدەتۋ جانە كورەي تۇبەگىنىڭ جالپى جاعدايى تۋرالى كەڭەسەتىنىن ايتقان. بۇدان سىرت كەزدەسۋدە اقش پەن سولتۇستىك كورەيا اراسىنداعى ديپلوماتيالىق ىستەردىڭ جاندانۋىنا شۆەتسيانىڭ اتقاراتىن ءرولى تۋرالى دا اقىلداسپاق.

شۆەتسيا – سولتۇستىك كورەيامەن ديپلوماتيالىق بايلانىس ورناتقان ساناۋلى عانا باتىس ەلدەرىنىڭ ءبىرى. سونىمەن بىرگە كوپ جىلدان بەرى سولتۇستىك كورەياداعى اقش-تىڭ ديپلوماتيالىق مۇددەلەرىن قورعاۋعا جاۋاپتى بولىپ كەلەدى. ايتالىق، سولتۇستىك كورەيادا ۇستالعان امەريكالىقتاردى بوساتۋ جانە ەلىنە قايتارۋ ىسىنە كومەكتەسكەن.

شۆەتسيا ءسىم وكىلى جۇما كۇنى وتەتىن ۋالستروم مەن ري يوڭ حو اراسىنداعى كەزدەسۋدە اقش وكىلدەرىنىڭ قاتىسۋى دا مۇمكىن ەكەنىن ايتقان. سونداي-اق ترامپ پەن كيم جوڭ ۋن اراسىنداعى كەزدەسۋ ءىسىن اقىلداسۋى مۇمكىن ەكەنىن دە جوققا شىعارمايدى.

سولتۇستىك كورەيا رەسمي باسىلىمدارىنىڭ كەشەگى حابارىندا، ري يون حو بەيجىڭ ساپارىنان ورالعاننان كەيىن، سىرتقى ەلدەردىڭ جاعدايىن ويلاستىرا كەلە، كيم جوڭ ۋن مەن ترامپتىڭ كەزدەسۋى تۋرالى الدىن الا وتەتىن كەڭەستى شۆەتسيادا وتكىزۋدى جوسپارلاعانىن جازعان.

قىتاي سىرتقى ىستەر مينيسترلىگى جاساعان مالىمدەمەدە بۇل ايتىلعانداردى راستاعان.

“The Qazaq Times”