تەرەزا مەي رەسەيلىك ديپلوماتتاردى ەلدەن قۋدى. فوتو: گولوس امەريكي.

ۇلىبريتانيانىڭ بۇۇ-داعى وكىلىنىڭ ورىنباسارى سارسەنبى كۇنى ۇيىمنىڭ ماجىلىسىندە مالىمدەمە جاساپ، ۋلى زاتپەن قاستاندىق جاساۋ ءىسىنىڭ تەكسەرۋ قورىتىندىسىن ورتاعا سالدى. ول جانە بۇل قاستاندىق ءىسىنىڭ ارتىندا رەسەيدىڭ تۇرعانىن قاداي ايتتى. بۇل تۋرالى VOA اقپاراتتىق سايتى حابارلادى.

بۇۇ-داعى ۇلىبريتانيا وكىلىنىڭ ورىنباسارى الان قاۋىپسىزدىك كەڭەسىنىڭ مۇشەلەرىنە: «بەلگىسىز بىرەۋلەر ۇلىبريتانيادا سوعىستا تىيىم سالىنعان اسا ۋلى حيميالىق زاتتى پايدالانىپ قاستاندىق جاسادى»، – دەپ مالىمدەدى.

بۇرىنعى رەسەيلىك اگەنت سەرگەي سكريپال مەن ونىڭ 33 جاستاعى قىزى يۋليا انگليانىڭ سيۋرسبەري قالاسىندا ەس-ءتۇسسىز كۇيىندە تابىلىپ، اۋرۋحاناعا جەتكىزىلگەن بولاتىن. مەديتسينالىق انىقتاۋدان كەيىن سكريپال مەن يۋليانىڭ اسا ۋلى زاتپەن ۋلانعانى جانە بۇل ۋلى زات قولدانۋعا تيىم سالىنعان «نوۆيچوك» ەكەنى ءمالىم بولدى. العاشقى مەديتسينالىق تەكسەرۋ جاساعان دارىگەرلەر مەن وقيعا ورنىنا الدىمەن جەتكەن بىرنەشە پوليتسيا قىزمەتكەرى دە جەڭىل دارەجەدە ۋلانعان.

بريتانيا وكىلى سوزىندە: «بۇل قاراپايىم قىلمىستىق ءىس ەمەس، بۇل ناعىز زاڭسىز كۇش قولدانۋ. بريتانيا ۇكىمەتى تىيىم سالىنعان ۋلى زاتتى انىقتايتىن دەربەس زەرتتەۋ توبى ارقىلى ءىستى زەرتتەۋ تالابىن قويادى»، – دەدى.

ۇلىبريتانيانىڭ پرەمەر-ءمينيسترى تەرەزا مەي كەشە تۇستەن بۇرىن مالىمدەمە جاساپ، 23 رەسەيلىك ديپلوماتتى ەلدەن شىعاراتىنىن مالىمدەدى.

رەسەيدىڭ بىرىككەن ۇلتتار ۇيىمىنداعى وكىلى ۆاسيلي نەبەنزيا ۇلىبريتانيانىڭ ايىپتاۋلارىن جوققا شىعاردى. ول قاۋىپسىزدىك كەڭەستىڭ مۇشەلەرىنە بۇل ءىستىڭ رەسەيمەن قاتىسى جوق ەكەنىن ايتىپ اقتالدى. ول سونداي-اق، ۇلىبريتانيا قاجەت ەتسە رەسەي تارابى تەرگەۋ ىستەرىنە بەلسەندى قولداۋ كورسەتە الاتىنىن دا مالىمدەدى. ول سوزىندە: «رەسەي 1992 جىلى حيميالىق قارۋدى دامىتۋدى توقتاتقان. ال، 2017 جىلدىڭ  قىركۇيەك ايىندا حيميالىق قارۋلاردىڭ بارلىق قورى جويىلعان»، – دەدى.

“The Qazaq Times”