بۇگىن ۇكىمەت جيىنىندا ۇلتتىق بانك توراعاسى قر پرەزيدەنتىنىڭ 5 الەۋمەتتىك باستاماسىندا ايتىلعان "7-20-25" باعدارلاماسىنىڭ تالاپتارى تۋرالى ايتتى. ۇلتتىق بانك باعدارلامانى ىسكە اسىرۋدىڭ بىرنەشە كەزەڭىن ايقىنداعان.

اقىشەۆتىڭ سوزىنشە، باعدارلاما بويىنشا بىرىنشىدەن بانكتەر مەن قور نارىعىنىڭ مۇمكىندىكتەرى بارىنشا ىسكە قوسىلادى.

"ول ءۇشىن يپوتەكالىق كرەديتتەردى سەكيۋريتيزاتسيالاۋ تەتىگىن قالپىنا كەلتىرۋ قاجەت. جاقىندا ۇلتتىق بانك باسقارماسى 100 پايىز ارنايى ەنشىلەس كومپانيا قۇرۋ ماسەلەسىن قارايدى. بۇل باعدارلامانىڭ وپەراتورى بولادى. جاڭا كومپانيانىڭ كاپيتالى ۇلتتىق بانك قاراجاتى ەسەبىنەن قالىپتاسادى. كومپانياعا كاپيتال قاجەت. سەبەبى "7-20-25" فورمۋلاسى بويىنشا بانكتەر بەرگەن جاڭا يپوتەكالىق كرەديتتەردى ساتىپ الادى. ول ءۇشىن كومپانيا نارىقتىق تالاپتار مەن قارجى نارىعىنان قاراجات تارتادى. بۇل سەكيۋريتيزاتسيا تەتىگى بولىپ تابىلادى", - دەدى اقىشەۆ ۇكىمەت وتىرىسىندا.

ۇلتتىق بانك باسشىسى اتاپ وتكەندەي، جوعارىدا اتالعان باعدارلاما قارىز الۋشىنىڭ تولەم قابىلەتى بولۋىن تالاپ ەتەدى.

"باعدارلاماعا رەسمي كىرىسى بار قازاقستان ازاماتى قاتىسا الادى. قازىر بانكتەرمەن شارتتار پىسىقتالۋدا. مىسالى تۇرعىن ءۇيدىڭ قۇنى 7 ملن تەڭگە بولسا، اي سايىنعى تولەم 50 مىڭ تەڭگەدەن اسپايدى. بۇل جالپى العاندا جۇمىس ىستەيتىن قازاقستان ازاماتتارىنىڭ كوپشىلىگى ءۇشىن قولايلى. تۇرعىن ءۇي قۇنى رەسپۋليكا بويىنشا ءارتۇرلى. سوندىقتان ءىرى قالالار مەن ايماقتار بويىنشا ديففەرەنتسياتسيا جۇرگىزىلۋى مۇمكىن", - دەدى ول.

سونداي-اق، اقىشەۆتىڭ سوزىنشە، جەڭىلدىكپەن بەرىلگەن يپوتەكالىق كرەديتتەر تولىعىمەن قامتاماسىز ەتىلىپ، تولىق قايتارىمدى بولۋى كەرەك.

"سوڭعى جىلدارى يپوتەكالىق كەرديت العان ازاماتتاردىڭ قۇقىقتارىن قورعاۋ بويىنشا نورمالار ەنگىزىلگەن. بۇل يپوتەكالىق كرەديت بەرۋدى تارتىمدى ەتەدى. سوندىقتان ولاردى قايتا قاراۋ قاجەت. ۇلتتىق بانك قاجەتتى زاڭدىق تۇزەتۋلەردى ناۋرىزدا ۇكىمەت قاراۋىنا جىبەرەدى(...).وسى زاڭنامالىق تۇزەتۋلەردى ۋاقىتىلى ىسكە اسىرۋ كەرەك", - دەدى باس بانكير.

ايتا كەتەيىك،   قر پرەزيدەنتى نۇرسۇلتان نازارباەۆ حالىقتى تۇرعىن ۇيمەن قامتاماسىز ەتۋ بويىنشا  "7-20-25" باعدارلاماسى ىسكە قوسىلاتىنىن ايتقان ەدى. وسى بويىنشا ۇكىمەت پەن ۇلتتىق  بانككە بارلىق العىشارتتارىن قاراستىرۋدى تاپسىرعان.

“The Qazaq Times”