يتالياداعى ليگا پارتياسىنىڭ كوشباسشىسى ماتتەو سالۆيني. فوتو: ۆەستنيك كاۆكازا

بىرنەشە جىلدان بەرى سەپاراتيستىك پيعىلدارىمەن جانە سولتۇستىك ليگا اتىمەن تانىمال يتاليانىڭ ليگا پارتياسى (Lega) سايلاۋدان كەيىنگى تاريحي جەڭىسىن تويلاۋدا.

اتالعان پارتيانىڭ پارلامەنت سايلاۋىندا ەڭ كوپ داۋىس جيناپ، وق بويى وزىق تۇرۋى پارتيا كوشباسشىسى ماتتەو ءسالۆينيدىڭ پرەمەر-مينيستر لاۋازىمىنا ءبىر قادام جاقىنداۋىنا سەبەپ بولعانى انىق.

ەۋروپا وداعىنا  قىرىن كوزقاراستاعى سالۆيني: "يتالياعا قاتىستى شەشىمدەر بەرليندى، ءپاريجدى نەمەسە بريۋيۋسسەلدى ەمەس، يتاليا حالقىن عانا تولعاندىرادى" - دەپ وداققا تاعى ءبىر "سالەمدەمە" جولدادى.

اقيقاتىندا، بريۋسسەلدىڭ دە ءسالۆينيدىڭ جەتەكشىلىگىندەگى ۇكىمەتكە سونشالىقتى جىلى قاباق تانىتپايتىنى انىق. پارتيا ليدەرى بولسا، بريۋسسەلدە الدەبىرەۋلەردىڭ پورتفەلدەرىن جيناپ، كەڭسەلەرىن بوساتۋعا ءماجبۇر بولاتىندارىن ايتۋدا. ال يتاليانىڭ اقپارات قۇرالدارىنىڭ حابارلاۋىنشا، مۇنداي "ستسەناريدىڭ" اۋىلى ءالى الىس.

"رەسپۋبليكا" (La Repubblica) اقپارات قۇرالىنىڭ قىزمەتكەرى پەرو كولاپريكو، ءسالۆينيدىڭ سوڭعى مالىمەتتەرىنە قاتىستى: ء"سالۆينيدىڭ ايتقان سوزدەرى قارجىلىق داعدارىستان كەيىنگى نيۋ-يوركتەگى ساپىرىلىسىپ، ءارى-ءسارى كۇيدە قالعان قارجىگەرلەردى ەسكە تۇسىرەدى. الايدا، ەۋروپادا الدەكىمدەردىڭ كەڭسەلەرىن تاستاپ كەتەتۋىنە ءماجبۇر ەتەتىندەي دەڭگەيدەگى ساياسي نەمەسە الەۋمەتتىك داعدارىس ازىرگە جوق", - دەدى.

 

سونىمەن قاتار، ەو-نىڭ يتاليا بيلىگى ەۋروپاعا قارسى وپپوزيتسياعا ەركىندىك بەرىپ قويمايتىنىنان ۇمىتتەنەتىنىن، ءتىپتى بۇل ماسەلەگە قاتىستى يتاليا پرەزيدەنتى سەردجو ماتتارەللاعا سەنىم ارتىپ وتىرعانىن ايتقان كەيبىر ساياساتكەرلەر: "ساياسات ساحناسىندا باسكەلەستىك ءالى دە جالعاسۋدا. سوڭى نە بولارىن بولجاۋ مۇمكىن ەمەس. دەگەنمەن، وسىعان قاراماستان ەو پرەزيدەنت ماتتارەللانىڭ تۇراقتى ۇكىمەت قۇراتىنىنا اسا سەنىمدى", - دەپ پايىمدايدى.

ايتا كەتۋ كەرەك، يتاليادا 4 ناۋرىز كۇنى پارلامەنت سايلاۋى وتكەن بولاتىن.

“The Qazaq Times”