«پرەزيدەنتتىڭ بەس الەۋمەتتىك باستاماسى» اتتى ۇندەۋىنىڭ تولىق نۇسقاسى

ناۋرىز ايىنىڭ ەلىمىزدىڭ تاۋەلسىزدىك كۇنتىزبەسىندە ەرەكشە ورنى بار.

ءبىز كوكتەمنىڭ العاشقى كۇنىندە العىس ايتۋ كۇنىن اتاپ وتەمىز.

سونىمەن بىرگە، بۇل – قازاقستان حالقى اسسامبلەياسى قۇرىلعان كۇن.

ۇلىستىڭ ۇلى كۇنى ناۋرىز مەيرامى شۋاقتى كوكتەم ايىنىڭ ەنشىسىندە.

قىمباتتى ايەلدەرىمىزدى دە مەرەكەسىمەن ناۋرىز ايىندا قۇتتىقتايمىز.

وسى ىزگى وقيعالاردىڭ ءبارى قازاقستان حالقىن بىرىكتىرە تۇسەدى.

«رۋحاني جاڭعىرۋ» باعدارلاماسى دا وسىعان باعىتتالعان.

ءبىز ەلدىڭ بىرلىگى مەن مەملەكەتتىڭ سىندارلى ساياساتىنىڭ ارقاسىندا بارلىق سىناقتاردان ابىرويمەن وتتىك.

ەل يەسى قازاق حالقىنىڭ ماڭىنا ۇيىسقان بارشا ەتنوستار ونى جوعارى باعالايدى.

بۇگىندە الماتى، باتىس قازاقستان، جامبىل جانە وڭتۇستىك قازاقستان وبلىستارىندا «قازاق ەلىنە مىڭ العىس» اتتى مونۋمەنتتەر بوي كوتەرگەن.

بۇل ەسكەرتكىشتەردى ەلىمىزدەگى ءتۇرلى ەتنوستىق توپتار باستارىنا كۇن تۋعان كەزدە باۋىرىنا باسقان قازاقتىڭ جەرى مەن ەلىنە العىس رەتىندە ءوز باستامالارىمەن تۇرعىزدى.

قازاق حالقى دا ولارعا ۇلتتىق تاريحىمىزعا كورسەتكەن زور قۇرمەتى ءۇشىن العىسىن بىلدىرەدى.

وسىنداي ءوزارا قۇرمەت پەن سەنىم مىزعىماس ەل بىرلىگىنە نەگىز بولسا، ىزگى شارالار حالقىمىزدىڭ كەڭ پەيىلى مەن دارحان كوڭىلىنىڭ ايقىن كورىنىسىنە اينالۋدا.

جاقسىلىقتى جادىندا ساقتاي بىلگەن  ەلدىڭ رۋحى قاشان دا بيىك.

زاماناۋي قازاقستاننىڭ ءوسىپ-وركەندەۋىنە ءاربىر وتانداسىمىز ءوز ۇلەسىن قوستى.

مەن ەتنو-مادەني بىرلەستىكتەرگە دە  ايرىقشا ريزاشىلىق  بىلدىرەمىن.

ءبىز، ءبارىمىز بىرگە وتە كۇردەلى، قيلى زامانداردان وتتىك.

تاۋەلسىزدىكتىڭ ەڭ تاعدىرشەشتى ساتتەرىندە مەنى ءاردايىم قولداعان حالقىما دا العىس ايتامىن.

وتكەن سايلاۋلاردىڭ بارىندە حالقىمىز مەنى ءبىراۋىزدان قولداپ، سايلادى.

مەن ءۇشىن ەڭ ۇلكەن ماراپات – وسى.

ەلىمنىڭ قولداۋى ماعان جۇمىس بارىسىندا زور كۇش-جىگەر بەردى.

مەن حالقىمنىڭ ءوز كەلەشەگىنە سەنىممەن قاراۋى ءۇشىن ەڭبەك ەتتىم، قازىر دە، بولاشاقتا دا وسى ماقسات جولىندا جۇمىس ىستەي بەرەمىن.

سول سەبەپتى، مەن بۇگىن قازاقستان رەسپۋبليكاسى پارلامەنتىنىڭ قابىرعاسىنان جاڭا الەۋمەتتىك باستامالار كوتەرىپ، حالقىما ۇندەۋ جاريالاعالى وتىرمىن.

بۇل قادام تالايدان بەرى مەنىڭ كوكەيىمدە ءجۇر.

بىراق، قازاقستان الدىمەن بويىنا كۇش، قازىناسىنا قارجى جيناپ، قۋاتتى ەلگە اينالۋى كەرەك ەدى.

مىنە، سول كۇن دە تۋدى!

بۇل – ءبىزدىڭ قوعامنىڭ الەۋمەتتىك بىرلىگىن نىعايتۋ ءۇشىن جىگەرىمىزدى جانىپ، ناقتى ىسكە كىرىسەتىن ءسات.

ءبىز ونى اۋقىمدى الەۋمەتتىك جوبالار ارقىلى جۇزەگە اسىرامىز.

مەملەكەت وسىنداي تۇبەگەيلى شارالاردى قولعا الادى.

«قازاقستان – ءبىزدىڭ ورتاق ءۇيىمىز» دەگەن يدەيا جاڭا ماعىنامەن تولىعا تۇسۋگە ءتيىس.

جاڭا ۇسىنىستاردىڭ ماڭىزدىلىعىن ەسكەرىپ، مەن ءاربىر قازاقستاندىقتىڭ ءال-اۋقاتىن ءارى قاراي جاقسارتا تۇسۋگە باعىتتالعان جاڭا الەۋمەتتىك باستامالارىمدى وزدەرىڭىزبەن تالقىلاۋ ءۇشىن بۇگىنگى پارلامەنت پالاتالارى مەن ۇكىمەتتىڭ بىرلەسكەن وتىرىسىن شاقىرتتىم.

بىردەن ايتايىن: بۇگىن ايتىلاتىن ۇسىنىستىڭ ءبارى – ەسەپ-قيسابى مۇقيات جاسالعان باعدارلاما.

بۇل – ەلدىڭ يگىلىگىنە ارنالعان ۇتىمدى، سونىمەن قاتار، وپتيميستىك جوبا.

مەن وركەندەگەن قازاقستان – ەڭ الدىمەن مەملەكەتى ءوزىن قورعاپ،  قولدايتىنىن، قامقورلىق جاسايتىنىن سەزىنەتىن، تيىسىنشە ەلىن جان جۇرەگىمەن سۇيەتىن، وزدەرىنە سەنىمدى ادامدار دەپ سانايمىن.

سول سەبەپتى، ءبىز بۇگىن جاڭا، اۋقىمدى الەۋمەتتىك جوبالارعا جول اشامىز.

قىمباتتى دوستار!

ءبىز بۇگىن الەۋمەتتىك جاڭعىرۋ جولىندا جاڭا، اۋقىمدى قادام جاساۋعا دايىنبىز.

مەن پرەزيدەنتتىڭ بەس الەۋمەتتىك باستاماسىن ۇسىنامىن.  

ءبىرىنشى باستاما: «ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ».

ءبىز سوڭعى جىلدارى قازاقستاندىقتاردىڭ باسپانا الۋ مۇمكىندىكتەرىن كەڭەيتۋ ءۇشىن كوپ نارسە جاسادىق.

2017 جىلى 11,2 ميلليون شارشى مەتر تۇرعىن-ءۇي پايدالانۋعا بەرىلدى.

بۇل – رەكوردتىق كورسەتكىش.

دەگەنمەن، ونىڭ ءوزى جەتكىلىكسىز، ءالى كۇنگە دەيىن كوپتەگەن وتباسى باسپاناسىز ءجۇر.

بۇل – ايرىقشا الەۋمەتتىك ماڭىزى بار ماسەلە.

ونىڭ شەشىمىن تۇرعىن-ءۇي يپوتەكاسىنىڭ قالىڭ كوپشىلىككە جاپپاي قولجەتىمدىلىگىن ارتتىرۋ ارقىلى تابۋعا بارلىق جاعداي جاساۋ كەرەك.

جۇمىس ىستەيتىن ءاربىر ادام نەسيەگە پاتەر ساتىپ الىپ، ونى وتباسىلىق بيۋدجەتىنىڭ مۇمكىندىكتەرى اياسىندا تولەي الاتىنداي بولۋى ءۇشىن ارزان رەسۋرستار ۇسىناتىن تەتىكتەر قاجەت.

سوندىقتان، مەن «7 – 20 – 25» باعدارلاماسىن ۇسىنامىن.

جۇمىس ىستەيتىن ءاربىر قازاقستاندىق تومەندەگىدەي شارتتار بويىنشا تەڭگەمەن نەسيە الۋ مۇمكىندىگىنە يە بولادى.

نەسيە ءوسىمىنىڭ مولشەرلەمەسى قازىرگىدەي 14-16 ەمەس، جىلىنا 7 پروتسەنتتەن اسپايتىن بولادى.

قازىر بانكتەر باستاپقى جارناعا باسپانا قۇنىنىڭ 30 پروتسەنتىنە دەيىن، كەيدە ءتىپتى 50 پروتسەنتىن سالۋدى تالاپ ەتسە، بۇل باعدارلاما بويىنشا ول 20 پروتسەنتتەن اسپاۋعا ءتيىس.

نەسيە الۋشىنىڭ اي سايىنعى تولەمىن ازايتۋ ءۇشىن ونىڭ مەرزىمى 10-15 ەمەس، 25 جىلعا دەيىن بولادى.

ول ءۇشىن ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەك.

ۇلتتىق بانك كەمىندە 1 تريلليون تەڭگە قارجى تارتاتىن ارنايى كومپانيا قۇرىپ، ول قارجىنى بانكتەردىڭ جوعارىدا ايتىلعان شارتتار بويىنشا بەرەتىن جاڭا يپوتەكالىق نەسيەلەرىن ساتىپ الۋعا جۇمساۋى قاجەت.

باعدارلامانى جۇزەگە اسىرۋ تۇرعىن-ءۇي قۇرىلىسىنا زور سەرپىن بەرەدى.

ناتيجەسىندە ميلليونداعان قازاقستاندىق ءۇشىن باسپانا الۋدىڭ قولجەتىمدىلىگى  ارتادى.

سونىمەن قاتار، بۇل ەكونوميكانىڭ، شاعىن جانە ورتا بيزنەستىڭ ورىستەۋىنە جۇمىس ىستەيدى، جاڭا جۇمىس ورىندارىن اشادى.

كوپتەگەن ازاماتتاردىڭ ارمانى اقيقاتقا اينالادى!

ەكىنشى باستاما: «جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ».

سالىستىرمالى تۇردە جالاقىسى تومەن قازاقستاندىقتاردى قولداۋ ءۇشىن 2019 جىلدىڭ 1 قاڭتارىنان باستاپ ولاردىڭ سالىق جۇكتەمەسىن 10 ەسەگە ازايتىپ، 1 پروتسەنت قانا سالىق سالۋدى ۇسىنامىن.

اي سايىن ەڭ تومەنگى ەسەپتىك كورسەتكىشتىڭ 25 ەسەلەنگەن كولەمىنەن از جالاقى الاتىندارعا سالىناتىن جەكە تابىس سالىعىن ازايتۋ ارقىلى ولاردىڭ سالىق جۇكتەمەسىن جەڭىلدەتۋ كەرەك.

ال وسىلايشا سالىقتى ازايتۋدان شىعاتىن قارجى ولاردىڭ جالاقىسىن كوبەيتۋگە جۇمسالۋى قاجەت.

ناتيجەسىندە، ەلىمىزدەگى بارشا جالدامالى جۇمىسكەرلەردىڭ كەمىندە ۇشتەن ءبىرىنىڭ، بۇل 2 ميلليوننان استام ادام، جالاقىسى جۇمىس بەرۋشىگە سالماق سالماي-اق كوبەيەتىن بولادى.

ءارى قاراي ۇكىمەت تابىس سالىعىنىڭ پروگرەسسيۆتى شكالاسىن ەنگىزۋ مۇمكىندىگىن زەردەلەۋى كەرەك.

ءۇشىنشى باستاما: «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ».

قازىر ەلىمىزدىڭ جوعارى وقۋ ورىندارىندا 530 مىڭنان استام جاس وقىپ جاتىر، ولاردىڭ 30 پروتسەنتكە جۋىعى مەملەكەت بولگەن گرانتپەن ءبىلىم الۋدا.

جوعارى ءبىلىم الۋدىڭ قولجەتىمدىلىگى مەن ساپاسىن ارتتىرۋ ءۇشىن تومەندەگىدەي شارالاردى ۇسىنامىن.

قازىر جىل سايىن بولىنەتىن 54 مىڭ گرانتقا قوسىمشا 2018-2019 وقۋ جىلىندا تاعى 20 مىڭ گرانت ءبولۋ كەرەك.

ونىڭ 11 مىڭى تەحنيكالىق ماماندىقتار بويىنشا باكالاۆرلىق ءبىلىم بەرۋگە تيەسىلى بولادى.

بۇل ءتورتىنشى ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە بولاتىن سان مىڭ جاڭا ماماندى دايارلاۋعا مۇمكىندىك بەرەدى.

مۇندا ەڭ الدىمەن ينجەنەرلەر، اقپاراتتىق تەحنولوگيا، روبوت تەحنيكاسى، نانوتەحنولوگيا سالاسىنىڭ ماماندارى تۋرالى ءسوز بولىپ وتىر.

بۇل دا جاستارعا مەملەكەت قامقورلىعىنىڭ ايقىن كورىنىسى.

سونىمەن بىرگە، تەحنيكالىق جانە اۋىل شارۋاشىلىعى ماماندىقتارى بويىنشا بارلىق جوعارى وقۋ ورىندارى گرانتتارىنىڭ قۇنىن ۇلتتىق جوعارى وقۋ ورىندارىنىڭ گرانتتارى دەڭگەيىنە دەيىن كوتەرۋ كەرەك.

اتالعان شارالار ورتا مەكتەپ تۇلەكتەرىن جوعارى بىلىممەن نەعۇرلىم كوبىرەك قامتۋعا مۇمكىندىك بەرەدى، بۇل – جالپى الەمدىك ترەند.

سونىمەن بىرگە، ادام رەسۋرستارىنا سالىناتىن ۇلكەن سالىم.

ءبىز الەمدىك ستاندارتتارعا ساي ءبىلىم بەرۋ جۇيەسىن قالىپتاستىرا وتىرىپ، ستۋدەنتتەردىڭ ءبىلىم الۋىنا جانە تۇراتىن جەرىنە جاعداي جاساۋعا ءتيىستى نازار اۋدارۋىمىز قاجەت.

قازىر جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسى وتە وزەكتى.

بۇل مىندەتتى شەشۋ ءۇشىن جوعارى وقۋ ورىندارى، كوللەدجدەر مەن دەۆەلوپەرلىك كومپانيالار مەملەكەت پەن جەكە مەنشىكتىڭ سەرىكتەستىگى قاعيداسىمەن جاتاقحانا سالۋدى باستاۋى كەرەك.

مەملەكەت ءوز تاراپىنان ءبىلىم جانە عىلىم مينيسترلىگى ارقىلى جاتاقحانا قۇرىلىسىنا جۇمسالعان ينۆەستيتسيالاردىڭ بەلگىلى ءبىر بولىگى بىرتىندەپ قايتارىلۋىنا كەپىلدىك بەرەدى.

2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن.

بۇل الداعى جىلداردا وسە تۇسەتىن سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەدى.

ءتورتىنشى باستاما: «شاعىن نەسيە بەرۋدى كوبەيتۋ».

ءوزىن-ءوزى ەڭبەكپەن قامتىعان جانە جۇمىسسىز تۇرعىنداردىڭ اراسىندا جاپپاي كاسىپكەرلىكتى دامىتۋ ءۇشىن اتقارىلىپ جاتقان جۇمىستاردىڭ اياسىندا جەڭىلدەتىلگەن شاعىن نەسيە بەرۋ نەعۇرلىم ءتيىمدى تەتىك سانالادى.

2017 جىلى جالپى سوماسى 32 ميلليارد تەڭگە بولاتىن 7200 شاعىن نەسيە بەرىلدى.

الايدا، «باستاۋ بيزنەس» جوباسى بويىنشا ءبىلىم العان تاعى 5 مىڭ ادام ءوز ءىسىن باستاۋعا قاجەتتى شاعىن نەسيەلەردى الا المادى.

سوندىقتان، 2018 جىلى قوسىمشا 20 ميلليارد تەڭگە ءبولىپ، شاعىن نەسيەلەردىڭ جالپى سوماسىن 62 ميلليارد تەڭگەگە جەتكىزۋدى تاپسىرامىن.

ناتيجەسىندە شاعىن نەسيە الاتىنداردىڭ سانى 2017 جىلمەن سالىستىرعاندا 2 ەسەگە ارتىپ، 14 مىڭ ادامعا جەتەتىن بولادى.

بۇل جۇمىستى ودان كەيىنگى جىلداردا دا بەلسەندى جالعاستىرۋ كەرەك.

باستاما مىڭداعان ادامعا ءوز ءىسىن اشۋعا مۇمكىندىك بەرەتىندىگىمەن ماڭىزدى.

بۇل، اسىرەسە، اۋىل-ايماقتار ءۇشىن، اۋىلداعى كاسىپكەرلىكتى دامىتۋ ءۇشىن ايرىقشا ماڭىزدى ەكەنىن اتاپ وتكىم كەلەدى.

بەسىنشى باستاما: «ەلدى گازبەن قامتاماسىز ەتۋدى جالعاستىرۋ».

ەلىمىزدە گاز ءوندىرۋ تاۋەلسىزدىك كەزەڭىندە جىلىنا 8-دەن 52 ميلليارد تەكشەمەترگە دەيىن ارتتى، ءارى قاراي دا وسە تۇسەدى.

قازىر ەلىمىزدەگى تۇرعىنداردىڭ 50 پروتسەنتكە جۋىعى گازبەن قامتاماسىز ەتىلگەن.

9 وبلىسقا گاز تارتىلعان.

دەگەنمەن، ورتالىق جانە سولتۇستىك وڭىرلەر ءالى دە گازسىز وتىر.

ءبىز قاراوزەك (قىزىلوردا وبلىسى) – جەزقازعان–قاراعاندى–تەمىرتاۋ–استانا باعىتىندا ماگيسترالدى گاز قۇبىرىن سالۋ جوباسىن جۇزەگە اسىرۋىمىز كەرەك.

وعان تيىسىنشە قاراجات تارتۋ قاجەت بولادى، سونىڭ ىشىندە حالىقارالىق قارجى ينستيتۋتتارىنان دا.

بۇل 2,7 ميلليون ادامدى گازبەن قامتاماسىز ەتۋمەن قاتار، شاعىن جانە ورتا بيزنەستىڭ جاڭا وندىرىستەرىن اشۋعا مۇمكىندىك بەرەدى.

سونىمەن بىرگە، ەكولوگيا جاقسارادى.

گازعا كوشۋ تەك استانانىڭ وزىندە زياندى قالدىقتاردىڭ اۋاعا تارالۋىن 6 ەسەگە نەمەسە جىلىنا 35 مىڭ تونناعا ازايتادى.

بۇل جوبانى جۇزەگە اسىرۋ ءارى قاراي وزگە وڭىرلەردى دە گازبەن قامتاماسىز ەتۋگە مۇمكىندىك بەرەدى.

پرەزيدەنتتىڭ بەس باستاماسى – وسى.

ولاردى ىسكە اسىرۋ جاڭا جۇمىس ورىندارىن قۇرۋعا، سول ارقىلى ەل ەكونوميكاسىنىڭ ءارى قاراي دامي تۇسۋىنە جول اشادى.

ۇكىمەت پەن ۇلتتىق بانككە باستامالاردى ىسكە اسىرۋدىڭ ەگجەي-تەگجەيلى تەتىكتەرىن جاساۋدى تاپسىرامىن.

پارلامەنت دەپۋتاتتارىنان زاڭناماعا قاجەت وزگەرىستەردى ۋاقتىلى ەنگىزۋدى وتىنەمىن.

باستامالاردىڭ ايرىقشا ماڭىزدى ەكەنىن ەسكەرسەك، ولاردى ءتيىمدى جۇزەگە اسىرۋدىڭ جولدارى كەڭىنەن تالقىلاۋدى قاجەت ەتەدى.

حالىق پەن بيزنەس وكىلدەرىنىڭ اراسىندا ءتۇسىندىرۋ جۇمىستارىن جۇرگىزۋ دە ماڭىزدى.

«نۇر وتان» پارتياسى حالقىمىز ءۇشىن ايرىقشا ماڭىزى بار وسى شارالاردىڭ تياناقتى ورىندالۋىن باقىلاۋعا الادى.

قۇرمەتتى وتانداستار!

مەملەكەتتىڭ جاڭا قادامدارى بۇكىل قازاقستاندىقتارعا، ەلىمىزدىڭ بارشا ازاماتتارىنا يگى اسەر ەتەدى.

قوعام ءوز تاعدىرىن قازاقستانمەن تىعىز بايلانىستىرىپ، بولاشاعىن جوسپارلاۋدىڭ تىڭ مۇمكىندىگىنە يە  بولادى.

باعدارلامانى زاڭدىق تۇرعىدان بەكىتۋ قاجەت دەپ سانايمىن.

ونى ىسكە اسىرۋ «الەۋمەتتىك مەملەكەت» تۋرالى كونستيتۋتسيالىق نورمانى جاڭا، ناقتى مازمۇنمەن بايىتا تۇسپەك.

زاماناۋي جاھاندىق احۋالدا ۇلتتىق بىرلىك – الەۋمەتتىك بىرلىك، ال قالىپتاسقان مەملەكەت –  الەۋمەتتىك مەملەكەت.

ءبىز وتكەنگە سالاۋات ايتىپ، كەلەشەككە كوز تىككەن ەلمىز.

ءبىز الەۋمەتتىك مەملەكەت پەن ۇلتتىق وركەندەۋدىڭ شىنايى، ءارى سىندارلى قازاقستاندىق مودەلىن مىندەتتى تۇردە بىرگە  جاسايتىنىمىزعا سەنىمدىمىن.

ارداقتى اعايىن! 

بۇگىنگى باستامالار ەلىمىز تۇتاس، قوعامىمىز تۇراقتى بولسا عانا تابىستى جۇزەگە اسادى.

ال، ەل بىرلىگى – ەڭ ءبىرىنشى، قازاقتىڭ بىرلىگى.

جاھاندىق كوشتىڭ باسىندا جۇرەتىن مەرەيلى ەل بولۋ ءۇشىن بىرلىك پەن ىنتىماق الدىمەن وزىمىزگە،  قازاققا كەرەك.

تاريحتىڭ ءوزى دالەلدەگەن ءبىر اقيقات بار  – حالقىمىز بىرلىكتە بولسا كۇشەيگەن، بىرلىگى قاشسا السىرەگەن.

قاسقا جولدى قاسىم حان جۇرتىن جۇدىرىقتاي جۇمىلدىرا بىلگەنىنىڭ ارقاسىندا قازىرگى قازاق جەرىنىڭ نەگىزگى اۋماعىن بىرىكتىردى.

«ەل بىرلىگى – ەل تەڭدىگى» دەگەن – وسى!

«قازاق ورداسىنىڭ ليكۋرگى» – ءاز تاۋكە ەلىن تاتۋلىققا ۇيىتا بىلگەندىكتەن قوي ۇستىنە بوزتورعاي جۇمىرتقالاعان زامان ورناتتى.

«بايلىق – بايلىق ەمەس، بىرلىك – بايلىق» دەگەن ءسوز سول زاماننان قالعان قاعيدا.

ەل باسىنا كۇن تۋعان كەزدە بارشا قازاق ابىلاي حاننىڭ اق تۋىنىڭ استىنا جينالعان سوڭ عانا جەرىن جاۋدان تازارتا الدى.

«بىرىككەن ءجۇز بىتىراڭقى مىڭدى الادى» دەپ بابالارىمىز وسىنى ايتقان.

قازاقتىڭ وسىناۋ 3 حانى – ەل تاريحىنداعى 3 اسقار تاۋ، ولاردى اسقاقتاتقان – ەل بىرلىگى.

سونىمەن بىرگە، التىباقان الاۋىزدىقتىڭ كەسىرىنەن ەلىمىز اڭىراپ، جەرىمىز قاڭىراپ قالعان كەزدەر دە از ەمەس.

بۇل دا – تاريحتىڭ اششى ساباعى.

«وتكەنگە قاراپ، ەرتەڭىڭدى تۇزە» دەگەن وسيەت بار، سەبەبى، وتكەننىڭ ونەگەسى – بۇگىنگى كۇننىڭ باعا جەتپەس بايلىعى.

وسىنى جادىندا تۇتىپ، تاريحتان تاعىلىم الا بىلگەن حالقىمىز تاۋەلسىزدىك داۋىرىندە تاتۋلىق پەن بىرلىكتىڭ، تىنىشتىق پەن تۇراقتىلىقتىڭ ارقاسىندا تالاي تابىستارعا كەنەلۋدە.

تابىسىمىزدى ەسەلەپ، تاۋەلسىزدىگىمىزدى باياندى ەتە ءتۇسۋ ءۇشىن بىزگە بالتالاسا دا  بۇزىلمايتىن بەرىك  اۋىزبىرشىلىك كەرەك.

بەرەكەلى بىرلىگىمىزدى كوزدىڭ قاراشىعىنداي ساقتاي الساق، مەرەكەلى تىرلىگىمىزگە تونەتىن قاۋىپ جوق.

ەل مەن جەردىڭ يەسى رەتىندە قازاقستانداعى جاقسى مەن جاماننىڭ بارىنە قازاق جاۋاپتى.

وسى ۇلى جاۋاپكەرشىلىكتى سەزىنىپ، بارشا ۇلىستاردىڭ ۇيىتقىسى بولىپ، وزگەگە ونەگە كورسەتە بىلەيىك.

سوندا عانا، حالقىمىزدىڭ اتىن يەلەنگەن قاسيەتتى قازاقستانىمىز كوركەيىپ، دامي بەرەدى.

ەلىمىزدىڭ كوڭىلى جايلى، تۇرمىسى مايلى بولادى.

وسىنى ۇنەمى ەستە تۇتىپ، تىڭ مىندەتتەردى تىندىرىمدى جۇمىسقا ۇلاستىرايىق!

ىسكە ءسات!

“The Qazaq Times”