قىتاي-پاكىستان اراسىندا تەرروريزمگە قارسى ىنتىماقتاستىق ورناتتى. فوتو: Quartz.

قىتاي سىرتقى ىستەر مينيسترلىگىنىڭ رەسمي مالىمدەمەسىندە، تەرروريزمگە قارسى كۇرەستە پاكىستانمەن ىنتىماقتاستىقتى جانە جان-جاقتى بايلانىستاردى كۇشەيتەتىنى ايتىلدى. بۇل تۋرالى «شينلاڭ» اقپاراتتىق سايتى حابارلادى.

قىتاي ءسىم وكىلى پاكىستاندى «بارلىق جاقتاعى سەنىمدى ءارى ستراتەگيالىق سەرىگىمىز» دەپ باعالاعان.

رەسمي مالىمەتتە، پاكىستاندى تەرروريزمگە قارسى كۇرەستەگى بەلسەندى ەل رەتىندە القاپ، «پاكىستان تەرروريزمدى قارجىلاندىرۋدى بولدىرماۋ ءۇشىن ۇلكەن ۇلەس قوستى» دەلىنگەن. ءارى، حالىقارالىق ۇيىمداردى پاكىستاننىڭ بۇل جەتىستىگىنە نازار اۋدارۋعا شاقىرعان. قىتاي-پاكىستان اراسىندا تەرروريزمگە قارسى بەرىك ىنتىماقتاستىق ورناتقانىن اتاپ وتكەن.

رەسمي بەيجىڭنىڭ پاكىستانمەن تەرروريزمگە قارسى كۇرەستە ىنتىماقتاستىقتى تەرەڭدەتۋى قىتايدىڭ وسى ايماقتاعى اسكەري ارەكەتتەرىنە جول اشقانىن بىلدىرەدى.  ول جانە ورتا ازيا، ورتا شىعىس ەلدەرىنە قىتايدىڭ اسكەري كەڭەيۋىنەن تىڭ قاتەرلەردى الا كەلەدى. 

 “The Qazaq Times”