تاليبان قوزعالىسى اقش-تى كەلىسىمگە كەلۋگە شاقىردى

تاليبان قوزعالىسى اقش-تى كەلىسىمگە كەلۋگە شاقىردى – دەپ حابارلايدى The New York Times گازەتى.

باسىلىم مالىمەتىنشە، اۋعانستانداعى تاليبان قوزعالىسى اقش-تى 17 جىلعا سوزىلعان سوعىستى توقتاتىپ، كەلىسىمگە كەلۋگە شاقىرعان. تاليبان قوزعالىسى تاراتقان مالىمدەمەدە: «اۋعانستان يسلام امىرلىگىنىڭ ساياسي بيۋروسى اقش شەنەۋنىكتەرىن اۋعانستان ماسەلەسىن رەتتەۋدە تەك يسلام امىرلىگىمەن عانا كەلىسسوزدەر جۇرگىزۋگە شاقىرادى. ەگەر اقش اۋعانستان حالقىنىڭ زاڭدى تالاپتارىن ورىنداپ، يسلام امىرلىگىمەن بەيبىت كەلىسسوزدەر جۇرگىزەتىن بولسا، وندا ول ماسەلەنىڭ شەشىلۋىنە سەپتىگىن تيگىزەدى» - دەلىنگەن.

وتكەن جىلى اقش تاليبان قوزعالىسىن كەلىسسوزدەر جۇرگىزۋگە ماجبۇرلەۋ ءۇشىن اۋعانستانداعى اسكەر سانىن كوبەيتىپ، اۋە شابۋىلىن جيىلەتكەن بولاتىن. بىراق پەنتاگوننىڭ بۇل ارەكەتىنە قاراماستان تاليبان قوزعالىسى ءالى كۇنگە دەيىن اۋعانستان اۋماعىنىڭ باسىم كوپشىلىگىن ءوز باقىلاۋىندا ۇستاپ تۇر.

“The Qazaq Times”