ترامپ: مەن شي مىرزانى سىيلايمىن، بىراق ءبىز ءوز ءىسىمىزدى ىستەۋىمىز كەرەك

اقش پرەزيدەنتى دونالد ترامپ تاعى ءبىر رەت قىتايمەن ساۋدا بارىس-كەلىسىن جاسايتىنىن ءبىلدىرىپ سيگنال جولدادى. ترامپ بۇل ويىن جۇما كۇنى ۋاشينگتوندا (ۆاشينگتون) وتكەن «كونسەرۆاتيۆتى ساياسي ءىس-قيمىل كونفەرەنتسياسى» كەزىندە ءبىلدىردى. بۇل تۋرالى VOA اقپاراتتىق سايتى حابارلادى.

پرەزيدەنت ترامپ سوزىندە: «قۇراما شتاتتىڭ جول بەرگىش ءداۋىرى اياقتالدى. ەندىگى جەردە اقش باسقا ەلدەرگە جول بەرە بەرمەيدى»، – دەي كەلىپ، اقش پەن باسقا ەلدەر اراسىنداعى ساۋدا تاپشىلىعى وتكەن جىلى 566 ميلليارد اقش دوللارىنان اسقانىن، سونىڭ ىشىندە قىتايمەن ساۋدا تاپشىلىعى 277,8 ميلليارد اقش دوللارىن قۇراپ، رەكوردتىق دەڭگەيگە جەتكەنىن العا تارتتى.

ترامپ وزىنەن بۇرىنعى ۇكىمەتتىڭ نە ءۇشىن بۇل جاعدايعا جول بەرىپ، قاراپ وتىرعانىن تۇسىنە المايتىنىن، بىراق ءوزى پرەزيدەنت بولىپ تۇرعاندا بۇنداي ىسكە استە جول بەرمەيتىنىن اتاپ ايتتى.

«مەن شي جينپيڭ مىرزانى قۇرمەتتەيمىن، بىراق ءبىز ءوزىمىز ىستەۋگە ءتيىستى ءىستى ىستەۋىمىز كەرەك»، – دەدى ترامپ.

“The Qazaq Times”