فوتو: euro.cz

20 اقپاندا ستوكگولمدە سوت الدىندا سويلەگەن 40 جاستاعى وزبەكستان ازاماتى راحمات اكيلوۆ وزىنە تاعىلعان ايىپتاردى مويىندادى. جەرگىلىكتى The Local باسىلىمىنىڭ جازۋىنشا، اكيلوۆ باستى ماقساتىم "شۆەتسيا ازاماتتارىن ءولتىرۋ" بولدى دەپ مالىمدەگەن.

40 جاستاعى وزبەكستاندىق راحمات اكيلوۆ سەيسەنبى كۇنى ستوكگولم سوتىنا جەتكىزىلدى. ول بىلتىر 7 ساۋىردە شۆەتسيا استاناسىندا تەراكت جاسادى دەپ ايىپتالىپ وتىر. ول جۇك كولىگىمەن جۇرگىنشىلەر جولىنداعى ادامداردى باسىپ كەتكەن. قازا تاپقاندار ىشىندە 11 جاستاعى قىز بالا مەن ۇلىبريتانيا جانە بەلگيا ازاماتتارى بولدى. ونداعان ادام جارالانعان.

«مەن شۆەتسيانىڭ حاليفاتقا قارسى سوعىستى توقتاتقانىن قالايمىن. ولار اسكەري ايماققا جاۋىنگەرلەرىن جىبەرۋدى توقتاتقانىن قالايمىن»، – دەپ كەلتىرەدى The Local راحمات اكيلوۆتىڭ سوزدەرىن.

اكيلوۆ ءوزىنىڭ ىسىنە ەش وكىنبەيتىنىن اشىق مالىمدەدى. «مەنىڭ ارەكەتىمنىڭ ماقساتى – ناتو كواليتسياسى شابۋىلىنان زارداپ شەككەندەرمەن جانىم دا، جۇرەگىم دە بىرگە ەكەنىن كورسەتۋ بولدى»، – دەگەن اكيلوۆ.

اكيلوۆ «يسلام مەملەكەتىنە» انت ەتكەنىن ايتقان. بىراق اتالعان ەكسترەميستىك ۇيىم ستوكگولمدەگى وقيعانى جاۋاپكەرشىلىگىنە المادى. بىراق تەرگەۋ مالىمەتىنشە، راحمات اكيلوۆقا سۇرياداعى تاجىك سودىرى تاپسىرما بەرىپ وتىرعان. ال ينسترۋكتورلاردىڭ ءبىرى داعىستان ازاماتى بولعان.

مەملەكەتتىك ايىپتاۋشى راحمات اكيلوۆتى ءومىر بويى تۇرمە جازاسىنا كەسۋدى سۇرادى. وعان قارسى سوت مامىر ايىنا دەيىن جالعاسىپ، ۇكىم ماۋسىم ايىندا شىعادى دەپ كۇتىلۋدە.

“The Qazaq Times”