موزامبيكتەگى قوقىس ءۇيىندىسى جانىنداعى ۇيلەردىڭ ۇستىنە قۇلاپ، 17 ادام قايتىس بولدى. قوقىس ءۇيىندىسىنىڭ استىندا قالىپ قويعاندار بولۋى مۇمكىن ، - دەپ حابارلايدى Al Jazeera اقپارات اگەنتتىگى.

ەل استاناسى ماپۋتو (Maputo) قالاسىندا بولعان قاتتى جاۋىن كەسىرىنەن حۋلەن قوقىس  ۇيىندىسى جەرگىلىكتى ۋاقىتپەن شامامەن 15,00 شاماسىندا دۇيسەنبى كۇنى قۇلاپ، 5 ءۇيدى قيراتقان.

ۇلتتىق قاۋىپسىزدىك قىزمەتىنىڭ وكىلى لەونيلدا پەلەمبەنىڭ (Leonilde Pelembe) ايتۋىنشا، ءۇيىندى استىندا تاعى ادامدار قالعان بولۋى مۇمكىن.

"جەرگىلىكتى بيلىك وكىلدەرىنىڭ مالىمدەۋىنشە، ءۇيىندى استىندا قالعان ۇيلەردە تۇراتىن ادامدار سانى قايتىس بولعاندار سانىنان كوپ. سول سەبەپتى ىزدەۋ جۇمىستارى ءالى جالعاسىپ جاتىر", - دەيدى پەلەمبە.

ءۇيىندى قۇلاعانعا دەيىن قالانىڭ كەدەي ايماقتارىنداعى تۇرعىندارعا باسقا جاققا كوشۋ كەرەكتىگىن جەرگىلىكتى بيلىك وكىلدەرى ايتقان كورىنەدى.

پورتۋگاليالىق "Lusa" اقپارات اگەنتتىگى قوقىس ءۇيىندىسى 3 قاباتتى عيماراتپەن تەڭەسكەنىن جازدى.

بۇۇ دامۋ باعدارلاماسىنىڭ اقپاراتىنشا، موزامبيك حالقىنىڭ 55 پايىزعا جۋىعى (شامامەن 14 ملن ادام) كەدەيشىلىكتە ءومىر ءسۇرىپ كەلەدى.

قالا تۇرعىنى ماريا حو (Maria Huo): "بۇل قوقىس ءۇيىندىسى ساقتالاتىن جەردى وسىدان 10 جىل بۇرىن جابۋ كەرەك بولعان. بىراق ولار ءالى دە ءۇستى-ۇستىنە قوقىستى اكەلىپ جاتىر. ەندى ناتيجەسىن كورىپ وتىرسىزدار. مەنىڭ ءۇيىم جارتىلاي قوقىستىڭ استىندا قالىپ، بالام جارقاتتاندى", - دەدى.

موزامبيك راديوسى وسى جاعدايدىڭ كەسىرىنەن باسپاناسىز قالعانداردى ۋاقىتشا ورنالاستىراتىن ورتالىق اشىلاتىنىن حابارلادى.

“The Qazaq Times”