اقش قورعانىس ءمينيسترى تۇركيا قارۋلى كۇشتەرىنىڭ وكىلدەرىمەن كەزدەستى. فوتو: Sputnik International.

ەۋروپا ەلدەرىنە جاساعان ساپارىنان قايتىپ ورالعان اقش قورعانىس ءمينيسترى جەيمس مەتتيس ۇشاقتان تۇسە سالا جۋرناليستەردىڭ سۇراعىنا جاۋاپ بەردى. ول سوزىندە ءسۇريادا تەررورلىق توپتاردان تازارتىلعان اۋماقتاردى حالىققا قايتارۋ ىسىندە تۇركيامەن ورتاق ۇستانىمعا كەلگەندەرىن ايتتى. بۇل تۋرالى «انادولى» اقپاراتتىق اگەنتتىگى حابارلادى.

مەتتيس سوزىندە: «ءسۇريادا تەررورلىق ۇيىمداردان تازارتىلعان اۋماقتاردى حالىققا قايتارىپ، بوسقىنداردى ورنالاستىرۋ ىسىندە تۇركيامەن ىنتىماقتاستىق ورناتتىق»، – دەدى.

دايش تەررورلىق ۇيىمىنان بوساتىلعان اۋماقتاردى باسقارۋ، سول اۋماقتان قاشىپ كەتكەن بوسقىنداردى مەكەندەرىنە قايتارۋ ىسىندە تۇركيا مەن اقش جانە تەرروريزمگە قارسى بىرلەسكەن كواليتسياعا مۇشە ەلدەر ورتاق مامىلەگە كەلىپ وتىر.

ايتا كەتەرلىگى، تۇركيا سۇرياداعى تەررورلاردان تازارتىلعان اۋماقتى تەز ارادا حالىققا قايتارىپ، بوسقىنداردى مەكەندەرىنە ورنالاستىرۋعا مۇددەلى. سەبەبى، تۇركيا جەرىندەگى سۇريالىق بوسقىندار سانى كۇن سايىن كوبەيىپ، ۇكىمەتتىڭ باستى الاڭداۋشىلىعىنا اينالىپ وتىر.

“The Qazaq Times”