قىتايدىڭ جوعارى لاۋازىمدىلارى. فوتو: Pinterest.

قىتاي ورتالىق كوميتەتىنىڭ ينسپەكتسيا جونىندەگى ورتالىق كوميسسياسى سەيسەنبى كۇنى حابارلاما جاساپ، بۇرىنعى ورتالىق كوميتەت ۇگىت-ناسيحات دەپارتامەنتىنىڭ ۆيتسە-ءمينيسترى لۋ ۋەيدى (Lu Wei) قىتاي كوممۋنيستىك پارتياسىنا ساتقىندىق جاسادى دەگەن ايىپپەن، قىزمەتتەن قالدىرىلعانىن جانە پارتيادان شىعارىلعانىن مالىمدەدى. ونىڭ بارلىق مال-مۇلكى تاركىلەنىپ، وعان قاتىستى بارلىق ءىستى قىتايدىڭ جوعارى دارەجەلى ءتارتىپ تەكسەرۋ ورگاندارى تەرگەمەك. بۇل تۋرالى «People» جانە «WSJ» باسىلىمى حابارلادى.

بيىل 58 جاستاعى لۋ ۋەي（Lu wei）2017 جىلدىڭ قاراشا ايىندا كوميسسيانىڭ تەكسەرۋىن قابىلداعان. سەيسەنبى كۇنگى مالىمدەمەدە لۋ ۋەيدىڭ قىلمىسى تۇراقتاندىرعانىن ايتتى. بۇدان سىرت، قىتاي ورتالىق كوميتەتىنىڭ 8 ءتۇرلى ەرەجەسىنە قايشىلىق جاساعانىن، بيلىگىن اسىرا پايدالانعان، كوڭىل اشۋ ورىندارىندا كوپ بوي كورسەتتى جانە تەرگەۋ كەزىندە جالعان مالىمەتتەر بەردى دەگەن سەكىلدى ايىپتار تاعىلعان.

باسىلىمنىڭ تىلشىلەرى لۋ ۋەيمەن حابارلاسۋ مۇمكىندىگىنە قول جەتكىزە الماعان. ونىڭ ۇستىنە ونىڭ ءوز قۇقىعىن قورعاۋ ءۇشىن زاڭگەرلەرمەن جۇمىس جاساۋىنا قىتاي ورتالىق ۇكىمەتى كەدەرگى بولاتىنى انىق. سوڭعى بىرنەشە ايدا ول تۋرالى كورگەن-بىلگەن لاۋازىمدى تۇلعالار جوق. سوندىقتان، ول ءبىراز ۋاقىتقا سۇراۋسىز قاماۋدا وتىرعان بولۋى مۇمكىن.

لۋ ۋەيمەن قاتار قىتاي ۇكىمەتى تاعى ءبىر جوعارى لاۋازىمدىسىن جەمقورلىق ايىبىمەن قولعا العان. مالىمەتتەرگە قارعاندا،  جەمقورلىقپەن ايىپتالعان ءسۇن جىڭتسايدى (Sun Zhengcai) وسىعان دەيىن قىتاي ۇكىمەتى جوعارى لاۋازىمدىلار اراسىندا شي جينپيڭنان كەيىن قحر توراعاسى بولۋ مۇمكىندىگى ەڭ جوعارى ادام دەپ تانىلىپ كەلگەن.

قىتاي ۇكىمەتىنىڭ بۇل قادامدارى الدىن-الا جوسپارلانىپ قويعانى انىق بولىپ وتىر دەپ جازدى «WSJ» باسىلىمى. سەبەبى، قىتاي بيلىگى بۇل ەكى لاۋازىمدىعا اتالعان كۇدىكتەردىڭ تاعىلعانىن وسىدان ەكى اي بۇرىن ايتىپ قويعان. اتالعان ەكى لاۋازىمدى دا شي جينپيڭنىڭ بيلىگىنىڭ العاشقى بەس جىلىندا ماڭىزدى مىندەتتەردى اتقارعان. ال، بىلتىر قازان ايىنداعى ۇكىمەت قۇرامىنىڭ جاڭالانۋىنان كەيىن شي جينپيڭ ءوز كومانداسىنان بىرقاتار ادامداردى شەتتەتتى.

“The Qazaq Times”