فرانتسيا پرەزيدەنتى ەممانۋەل ماكرون. فوتو: The Atlantic.

فرانتسيا پرەزيدەنتى ەممانۋەل ماكرون مالىمدەمەسىندە ەگەر سۇرياداعى باشار اساد بيلىگىنىڭ حالىققا حيميالىق قارۋ قولدانعانى تۋرالى انىق دالەل بولسا، وندا فرانتسيا كۇشتەرى اساد رەجيمىنىڭ حيميالىق قارۋ ساقتاعان ورىندارىن بومبالايتىنىن ايتتى. بۇل تۋرالى «شينلاڭ» اقپاراتتىق سايتى جازدى.

جۋرناليستەردى قابىلداعان كەزدە ماكرون فرانتسيا ۇكىمەتىنىڭ ادىلەتتىلىكتى جاقتايتىنىن، قاندايدا ءبىر رەجيمنىڭ حالىققا كۇش قولدانۋىنا قارسى ەكەنىن ايتتى. ول جانە ءسۇريادا حالىققا حيميالىق قارۋ قولدانىلسا فرانتسيا بيلىگىنىڭ قاراپ وتىرمايتىنىن اتاپ ايتتى.

فرانتسيا پرەزيدەنتى اساد بيلىگىنىڭ حيميالىق قارۋ قولدانعان، قولدانباعانى تۋرالى تەكسەرۋ ىسىنە باسا نازار اۋدارىپ وتىرعانىن، قازىرگە ءسۇريانىڭ قازىرگى ۇكىمەتىن ايىپتايتىن تولىق دالەلدىڭ جوق ەكەنىن دە العا تارتتى.

ال، سۇرياداعى ادام قۇقىقتارىن قورعاۋ ورتالىعىنىڭ مالىمەتىنە قاراعاندا، باشار اساد ۇكىمەتى وسىعان دەيىن ەل كولەمىندە 211 رەت حيميالىق شابۋىل جاساعان. سونىڭ ناتيجەسىندە 1421 ادام قازا بولعانىن ايتادى.

“The Qazaq Times”