قازاقستان ەڭ باقىتتى ەل اتاندى

Gallup International تاۋەلسىز زەرتتەۋ اگەنتتىگى قاۋىمداستىعى جاساعان باقىت يندەكسىندە قازاقستان 74 پايىز كورسەتكىشپەن جەتىنشى ورىندى يەلەندى.

سونداي-اق، ەڭ باقىتتى ەلدەردىڭ العاشقى وندىعىنا فيدجي، كولۋمبيا، فيليپپين، مەكسيكو، ۆەتنام، پاپۋا – جاڭا گۆينەيا، يندونەزيا، ارگەنتينا جانە نيدەرلاندى كىرگەن.

Gallup International تاۋەلسىز زەرتتەۋ اگەنتتىگى ۇسىنعان مالىمەت.

زەرتتەۋ اۆتورلارىنىڭ پىكىرى بويىنشا، ەڭ باقىتسىز ەلدەر تىزىمىندە ۋكراينا، يراك جانە يران تۇر.

زەرتتەۋ كەزىندە "2018 جىل وتكەن جىلعا قاراعاندا وتە جاقسى بولادى دەپ ەسەپتەيسىز بە؟" دەگەن ساۋالناماعا قاتىسقان قازاقستاندىقتاردىڭ 46 پايىزى جاقسى بولاتىنىن ايتسا، 11 پايىزى ناشار بولاتىنىن، 36 پايىزى اسا وزگەرىس بولمايتىنىن ايتقان. ال 7 پايىزى جاۋاپ بەرۋدەن قالىس قالعان.

ساۋالناماعا الەمنىڭ 55 ەلىنەن 54 مىڭ ادام قاتىسقان. ساۋالناماعا قاتىسۋشىلارعا كوبىنە باقىت تۋرالى سۇراق قويىلعان.

رەسپوندەنتتەردىڭ  كوبى (59%) وزدەرىن باقىتتى سەزىنەتىندەرىن ايتسا، ساۋالناماعا قاتىسقان ءاربىر ونىنشى ادام وزدەرىن "باقىتسىزبىن" (11%) دەپ ەسەپتەيدى ەكەن. ال قالعاندارى وزدەرىن نە باقىتتىلاردىڭ، نە باقىتسىزداردىڭ ساناتىنا قوسپايتىندارىن ايتقان.

وسىلايشا ساۋالناماعا قاتىسقانداردىڭ بەرگەن وڭ جانە تەرىس جاۋاپتارىنىڭ ايىرماشىلىعى ەسەپكە الىنىپ، الەمدىك باقىت يندەكسى 48 پايىز كورسەتكىشتى قۇراعان.

“The Qazaq Times”