فوتو: en.wikipedia.org

ۇلىبريتانيا پارلامەنت مۇشەسى لوندوندا انتي-كاتار كونفەرەنتسياسىن ۇيىمداستىرۋ ءۇشىن 20 700 اقش دوللار (15 مىڭ فۋنت) العان، - دەپ مالىمدەيدى Buzzfeed اقپارات اگەنتتىگى.

دانيەل كاچينسكي (Daniel Kawczynski) كونفەرەنتسياعا "تەك كاتار وپپوزيتسياسى تۋرالى بىلۋگە بارامىن" دەگەنىنە قاراماستان، اتالعان قاراجاتتى قالتاسىنا باسىپ العان كورىنەدى.

جاھاندىق تۇراقتىلىق جانە قاۋىپسىزدىك كونفەرەنتسياسى قىركۇيەكتە كاتاردا ساۋد ارابياسى باستاعان ەلدەر توبىنا كاتاردىڭ جاريالاعان ديپلوماتيالىق بويكوتى فونىندا  وتكەن بولاتىن.

اتاپ ايتقاندا، بىرىككەن اراب امىرلىكتەرى، باحرەين جانە مىسىر كاتارعا "تەرروريزمدى" قولداعانى جانە ولاردىڭ ايماقتاعى نەگىزگى قارسىلاستارى - يرانمەن بايلانىسقانى ءۇشىن ايىپ تاعىپ، بارلىق قارىم-قاتىناسىن ۇزگەن بولاتىن. دوحا (Doha) بۇل ايىپتاردى جوققى شىعاردى.

كاتاردىڭ "تەررورلىق توپتارعا دەمەۋشىلىك كورسەتۋى" لوندونداعى كونفەرەنتسيانىڭ باستى تاقىرىپتارىنىڭ ءبىرى بولدى.

كونفەرەنتسيانى كاتار ۇلتتىق دەموكراتيالىق پارتياسىنىڭ نەگىزىن قالاۋشى، شىعاناقتا ورنالاسقان ەلدەردەگى رەجيمنىڭ وزگەرۋىن قولدايتىن 29 جاستاعى حاليد ال-حايل (Khalid al-Hail) ۇيىمداستىردى.

ساراپشىلار ءبىر جاعىنان كونفەرەنتسيانى كاتارداعى كوتەرىلىستى قولداۋ ءۇشىن ۇيىمداستىرىلعان بولۋى مۇمكىن ەكەندىگىن ايتىپ، ساۋد ارابياسى مەن ءباا-ءنى ايىپتايدى.

كاچينسكي مونارحيانى قولداپ-قولپاشتاۋ ارەكەتتەرى ءۇشىن "ساۋد ارابيانىڭ قۇرمەتتى ازاماتى" اتاعىنا يە بولىپ، حايل جۇبايى تاتيانا گيسكانىڭ (Tatiana Gisca) كومپانياسىنان 7500 فۋنت كولەمىندە 2 رەت تولەم العانى جايلى مالىمدەمە جاسادى.

بىراق ول مالىمدەمەدە تولەماقى قانداي كونفەرەنتسياعا نەمەسە تاقىرىپقا بايلانىستى جۇرگىزىلگەنى تۋرالى ەشنارسە ايتىلمادى. كاچينسكي ساۋد ارابيانىڭ نەمەسە ءباا-ءنىڭ كونفەرەنتسيانى قارجىلاندىرعانىنا سەنبەيتىنىن ايتتى.

سونىمەن قاتار كاچينسكي: "راسىمەن قىزىق كونفەرەنتسيا بولدى جانە ماعان سوندا ءسوز سويلەۋ بۇيىردى. تولەماقىلاردى ۋاقىتىندا تىركەدىم. سىزدەردىڭ بولجامدارىڭىز قاتە، جوق جەردەن داۋ شىعارۋعا تىرىسىپ جاتىرسىزدار", - دەدى.

حايل دا كاتاردىڭ ايماقتاعى قارسىلاستارىنان قانداي دا ءبىر قاراجات العانىن جوققا شىعاردى.

“The Qazaq Times”