وڭتۇستىك سۋداندا سارباز-بالالاردىڭ سانى ارتىپ كەلەدى

جون (John) وڭتۇستىك سۋداننىڭ ۇلتتىق ليبەرالدى قوزعالىسىنا ءوز ەركىنسىز الىنعان 700 بالانىڭ ءبىرى. ونىڭ جاسى بار بولعانى 15-تە بولاتىن.

جون Al Jazeera-عا بەرگەن سۇحباتىندا: "باققا قاراي بارا جاتقانىمىزدا ولار ءبىزدى كۇشتەپ الىپ كەتتى. قاشىپ قۇتىلعان كۇننىڭ وزىندە كەيىننەن تاۋىپ الادى دا، قايتادان اسكەرگە قوسادى" - دەدى.

وڭتۇستىك سۋدانداعى ازاماتتىق سوعىستىڭ جالعاسىپ كەلە جاتقانىنا 5 جىل. سونىڭ كەسىرىنەن مىڭداعان ادام قايتىس بولىپ، ەلدەن ميلليونداعان ادام كوشىپ كەتتى.

يۋنيسەف مالىمەتىنشە، ەلدىڭ اسكەر قاتارىنداعى بالالار سانى 2013 جىلى سوعىس باستالعاننان بەرى كۇننەن كۇنگە ارتىپ كەلەدى.

ۇلتتىق ليبەرالدىق قوزعالىس قاتارىنا الىنعان 13 جاستاعى سارا (Sarah): "باقتا جۇمىس ىستەپ جاتقانىمدا ولاردىڭ كەلە جاتقانىن كورىپ قاشا جونەلدىم. "نەگە قاشىپ بارا جاتىرسىڭ؟ ءدال قازىر توقتاماساڭ، اتا سالامىز" دەگەننەن كەيىن ورنىمدا تۇرىپ قالدىم", - دەگەن.

8 اقپان كۇنى يامبيودا (Yambio) ۇلتتىق ليبەرالدىق قوزعالىس قاتارىندا 300-دەن استام بالا بار ەكەنى انىقتالدى. بىراق اسكەري توپتار بالالاردى كۇشتەپ وزدەرىنىڭ قاتارىنا الاتىندىعىن مويىندامايدى.

جالپى سوڭعى 5 جىلدا ەلدەن 2000-عا جۋىق بالا كوشىرىلگەن، بىراق اسكەري توپتار ولاردىڭ ورنىن تولتىرىپ ۇلگەرىپ جاتىر. بالالاردىڭ كوبىسى وتباسىلارىنىڭ قايدا ەكەنىن دە بىلمەيدى. ال قالعاندارى سوعىسسىز ءومىردى ەلەستەتە المايتىنداي جاعدايعا جەتكەن.

"قازىرگى مىندەتىمىز - سول بالالاردى قوعامعا قايتا قوسۋ. ال بۇل پروتسەسس كەمىندە 2-3 جىل ۋاقىتتى الادى. ولاردى جانۇيالارىنا قايتارىپ، مەكتەپكە اپارۋ كەرەك. سونىمەن قاتار جازىقسىز بالالاردى قايتادان اسكەر قاتارىنا كۇشتەپ الىپ كەتپەستەي ەتۋ كەرەك" دەيدى يۋنيسەف وكىلى ماحومبو مدوي (Mahombo Mdoe).

“The Qazaq Times”