بالقان تۇبەگىندەگى ورنالاسقان بوسنيا جانە گەرتسەگوۆينا ءانۇرانى ءسوزسىز ورىندالاتىن الەمدەگى 3 ەلدىڭ (قالعان ەكەۋى: يسپانيا مەن سان-مارينو) ءبىرى. Euronews مالىمەتىنشە، بوسنيا ساياساتكەرلەرى 19 جىل بويى ءانۇران سوزىنە بايلانىستى ءبىر شەشىمگە كەلە الماي كەلەدى.

دۇيسەنبى كۇنى پارلامەنت ءانۇراننىڭ ءسوزىن بەكىتۋ ماسەلەسىن قايتا كوتەردى. بوسنيا دەموكراتيالىق قوزعالىسىنىڭ وكىلى مومچيلو نوۆاكوۆيچ (Momcilo Novakovic): "قازىر قولىمىزدا بوسنيالىقتارعا دا، سەربتەرگە دە، حورۆاتتارعا دا ۇنايتىنداي ءماتىن جوق بولىپ تۇر. سول سەبەپتى دە پارلامەنت ەشقايسىسىن قابىلدامايدى. بۇل ماسەلەنى قايتا كوتەرۋ ۋاقىت جوعالتۋ دەپ ويلايمىن", - دەگەن بولاتىن.

قازىرگى ءانۇران اۋەنى بوسنيالىق سازگەر دۋشان شەستيچكە (Dusan Sestic) تيەسىلى، ول 1999 جىلى ءسوزسىز قابىلدانعان. 10 جىل بويى ءانۇران ءسوزسىز ورىندالىپ كەلدى. تەك 2009 جىلى پارلامەنت شەستيچ پەن بەندجامين يسوۆيچقا (Sestic and Benjamin Isovic) ءانۇران ءسوزىن جازدىرتادى، بىراق ول ءماتىن ەلدەگى نەگىزگى ەتنيكالىق توپتار - بوسنيالىقتار، سەربتەر مەن حورۆاتتاردى قامتىماۋى سەبەبىنەن قايتادان الىنىپ تاستالدى.

انۇرانعا سوزبەن جان ءبىتىرۋدىڭ كەلەسى ارەكەتى 2016 جىلى بولدى. بىراق ول دا ەشقانداي ناتيجە اكەلمەدى.

“The Qazaq Times”