الەمدەگى ەڭ قۋاتتى زىمىران ۇشىرىلدى

كۇنى كەشە، 6 اقپاندا، Falcon Heavy زىمىرانى كەننەدي عارىش ورتالىعىنداعى (فلوريدا) 39ا ۇشىرۋ كەشەنىنەن عارىشقا ءساتتى كوتەرىلدى. ول بىرنەشە كورسەتكىش بويىنشا الەمدەگى ەڭ قۋاتتى زىمىران اتاندى. اتالعان زىمىران وربيتاعا وزىمەن 64 توننا جۇك (18 "Boeing 717" ۇشاعى كوتەرە الاتىن سالماققا تەڭ) كوتەرە الادى. وسكە تۇسەتىن وسىنشا سالماق پەن قىسىمدى ەسكەرسە، Falcon Heavy بولاشاقتا ادامداردى مارسقا اپارا الادى دەۋگە بولادى، - دەيدى SpaceX كومپانياسى وكىلدەرى.

Falcon Heavy-دىڭ ۇشىرىلاتىن كۇنى بەلگىلى بولعان ساتتەن عارىش ورتالىعى جانىنداعى بارلىق قوناقۇيلەر مەن كولىك تۇراقتارىنداعى ورىندار ساتىلىپ كەتتى.

يلون ماسك زىمىراندى ۇشىرۋعا دايىندىق كەزەڭىندە "بۇل عارىش تاريحىنداعى ەڭ مىقتى زىمىراننىڭ ءساتتى كوتەرىلۋى بولا ما، الدە اسپانداعى كوزدىڭ جاۋىن الار وتشاشۋعا كۋا بولامىز با - ءازىر بەلگىسىز. بىراق الەمنىڭ تۇپكىر-تۇپكىرىنەن وسى جايتتى كورۋ ءۇشىن مىڭداعان ادام كەلدى" دەگەن بولاتىن.

عارىش كەمەسىنە يلون ماسكتىڭ سپورتتىق كولىگى تيەلىپ، وعان سكافاندر كيگەن قۋىرشاق ادام وتىرعىزىلعان. زىمىراننىڭ وربيتاداعى قوزعالىسىنىڭ ۆيدەوسىن  SpaceX سايتىنان كورۋگە بولادى.

“The Qazaq Times”