ۇلتتىق مۋزەي ۇلى تۇلعالاردىڭ ۇرپاقتارىن ۇيىستىردى

قازاقستان رەسپۋبليكاسى ۇلتتىق مۋزەيىندە «ۇلى تۇلعا ۇرپاقتارى» اتتى جوبانىڭ تانىستىرىلىمى ءوتتى.

ۇلتتىق مۋزەيگە جينالعان ۇلى تۇلعالاردىڭ ۇرپاقتارى.

اتالعان شاراعا الاش قايراتكەرى قوشمۇحامبەت كەمەڭگەروۆتىڭ، قازاقتىڭ ايگىلى اقىنى، ءانشى، كومپوزيتور كەنەن ازىرباەۆتىڭ, قازاق كسر-نىڭ حالىق ءارتىسى  عاريفوللا قۇرمانعاليەۆتىڭ, قازاقستاننىڭ ەڭبەك سىڭىرگەن ەكونوميسى سانجار جاندوسوۆتىڭ,  قازاق كسر مەملەكەتتىك سىيلىعىنىڭ لاۋرەاتى، كومپوزيتور ەركەعالي راحماديەۆتىڭ, قوعام قايراتكەرى ءازىربايجان مامبەتوۆتىڭ، كومپازيتور عازيزا جۇبانوۆانىڭ ۇرپاقتارى قاتىستى.

ەركەعالي راحماديەۆتىڭ جۇبايى كلارا اپاي

شارادا ءسوز العان ۇلتتىق مۋزەي ديرەكتورى دارحان مىڭباي: «ءبىز وتكەن تاريحتىڭ قاتەلىگىن قايتالامايىق. ءىز-ءتۇسسىز كەتكەن ءبىزدىڭ قانشاما قايراتكەرلەرىمىز بار. ەندىگى جەردە ونداي ولقىلىقتى بولدىرماۋ ماقساتىندا ءبىز اسىلدىڭ سىنىعى دەپ باعالاپ وتىرعان كەشەگى ءبىزدىڭ تانىمال تۇلعالارىمىزدىڭ ۇرپاقتارىمەن كەزدەسىپ وتىرمىز. شىن مانىندە بۇل شارا ۇلكەن ماڭىزعا يە. ءبىز ۇلىلاردىڭ ۇرپاعىن ىزدەپ جاتساق ول ەرتەڭگى كۇن ءۇشىن قۇندى مالىمەت جيناۋ ماقساتىندا دەپ ايتا الامىن», – دەدى.

سانجار جاندوسوۆتىڭ ۇرپاعى – جانار جاندوسوۆا

كەلگەن قوناقتار جوبا جۇمىسىنا ساتتىلىك تىلەپ، ءوز ويلارىن ورتاعا سالدى. الداعى ۋاقىتتا ۇلتتىق مۋزەيمەن تىعىز بايلانىس ورناتاتىندىقتارىن دا ايتتى.

«ۇلى تۇلعا ۇرپاقتارى» جوباسىنىڭ ماقساتى – قازاق تاريحىندا ورنى بار تانىمال ازاماتتاردىڭ، مەملەكەت جانە قوعام قايراتكەرلەرىنىڭ، تاريحشىلاردىڭ، عالىمداردىڭ، تانىمال ونەرپازدار مەن سپورت ساڭلاقتارىنىڭ ۇرپاقتارىمەن ۇلتتىق مۋزەي اراسىندا تىعىز بايلانىس ورناتۋ. سونىمەن قاتار، تانىمال تۇلعالاردىڭ ۇرپاقتارى جايلى اقپارات جيناۋ جانە جينالعان مالىمەتتەر نەگىزىندە دەرەكتەر قورىنجاساۋ.

ايگۇل كەمەڭگەروۆا

الداعى ۋاقىتتا جوبا ۇلتتىق مۋزەيدىڭ ۇيىتقى بولۋىمەن جالعاسىپ، ەلىمىزدىڭ تۇپكىر-تۇپكىرىندەگى تانىمال تۇلعالاردىڭ ۇرپاقتارىمەن بايلانىس ورناتىلادى.

“The Qazaq Times”