سولتۇستىك كورەيانىڭ بەرليندەگى ەلشىلىگى قارۋ-جاراق ساۋداسىمەن اينالىسقان

گەرمانيانىڭ بارلاۋ اگەنتتەرى سولتۇستىك كورەيا ءوزىنىڭ بەرليندەگى ەلشىلىگى ارقىلى يادرولىق باعدارلامالارىنا قاجەتتى جابدىقتار مەن تەحنولوگيالاردى ساتىپ الاتىنىن اشكەرەلەدى. بۇل تۋرالى VOA اقپاراتتىق پورتالى حابارلادى.

گەرمانيانىڭ فەدەرالدى كونستيتۋتسيالىق قورعانىس ۆەدومستۆوسىنىڭ باسشىسى مەيسون NDR تەلەارناسىنا بەرگەن سۇحباتىندا، گەرمانيا ۇكىمەتى قارا بازارداعى يادرولىق باعدارلاما ءۇشىن قاجەتتى قۇرال-جابدىقتاردى ساتۋشىلار گەرمانياداعى سولتۇستىك كورەيانىڭ ەلشىلىگى ارقىلى ساۋدالاسۋى مۇمكىن دەپ كۇدىكتەنەتىنىن ايتقان.

مەيسون سوزىندە سولتۇستىك كورەيانىڭ ناقتى قانداي جابدىقتار مەن تەحنولوگيالاردى ساتىپ العانى تۋرالى اشىق ايتپادى، بىراق اسكەري جانە الەۋمەتتىك سالادا بىردەي قولدانىلاتىن تەحنولوگيالاردى ساتىپ العان دەپ مەجەلەيدى.

NDR ارناسىنىڭ حابارىنا قاراعاندا، سولتۇستىك كورەيا 2016 جانە 2017 جىلدارى وسىنداي ساتىپ الۋ ارەكەتتەرىن جۇزەگە اسىرعانىن ايتادى. سونداي-اق، 2014 جىلى سولتۇستىك كورەيانىڭ ءبىر ديپلوماتى حيميالىق قارۋ وندىرۋگە پايدالانىلاتىن مونيتور ساتىپ الۋعا ارەكەتتەنگەنىن دە العا تارتقان.

دەگەنمەن، CNN جۋرناليستەرى گەرمانيادا تۇراتىن سولتۇستىك كورەيا ەلشىلىگىنەن بۇل سوزگە قاتىستى سۇراقتار سۇراعاندا، اتالعان ەلشىلىك بۇل ايتىلعانداردى تەرىسكە شىعارىپ، جالعان اقپارات دەپ ايىپتاعان.

“The Qazaq Times”