فوتو: akorda.kz

جاڭا 2018 جىلدىڭ باستالعانىنا ءبىر ايدان استام ۋاقىت ءوتتى. وسى ۋاقىت ارالىعىندا نۇرسۇلتان نازارباەۆ ءبىر عانا رەسمي ءىس-ساپار جاسادى. ول 16 قاڭتار كۇنى ۋاشينگتوندا اقش پرەزيدەنتى دونالد ترامپپەن كەزدەستى. اتالمىش ءىس-ساپاردى ايتپاعان، جازباعان، تالقىلاماعان گازەت، جۋرنال، تەلەارنا، سايت قالمادى. بىراق بۇگىن ءبىز نۇرسۇلتان نازارباەۆتىڭ بۇل ءىس-ساپارى جونىندە ەمەس، بىلتىرعى جىلعى جۇمىس جوسپارى جونىندە ءسوز قوزعايتىن بولامىز. وتكەن جىلى نازارباەۆ ىشكى جانە سىرتقى ساياساتتا كىمدەرمەن ءجيى كەزدەستى؟ ىشكى ساياساتتا قاي ۆەدومستۆا باسشىسىن ءجيى قابىلدادى؟ 

2017 جىلى 77 جاسقا كەلگەن نۇرسۇلتان نازارباەۆ ءوزىنىڭ جۇمىس جوسپارىمەن جاس بۋىندى تاڭ قالدىردى. ول ءوزىنىڭ تىعىز جۇمىس گرافيگىمەن ءالى دە بولسا كەز كەلگەن جاس ساياساتكەردى ون ورايتىنىن كورسەتتى. بۇعان اقوردانىڭ رەسمي سايتىن پاراقتاپ كورسەڭىز ءوزىڭىز دە كوز جەتكىزەسىز.

اقوردا رەسمي سايتىنداعى مالىمەتتەرگە سۇيەنەتىن بولساق، بىلتىر نۇرسۇلتان نازارباەۆ جىل بويىنا باس-اياعى 20 رەسمي ءىس-ساپار جاساعان. ونىڭ 9-ى شەتەلگە، 11-ءى ەل ىشىنە جاسالعان رەسمي ءىس-ساپارلار. 2017 جىلى نۇرسۇلتان نازارباەۆ سىرتقى ساياساتتا باسىمدىقتى بۇرىنعىسىنشا رەسەيگە بەرگەن. ول وتكەن جىلى ۆلاديمير پۋتينمەن بەس رەت كەزدەسىپ، 11 رەت تەلەفون ارقىلى سويلەسىپ، سولتۇستىكتەگى كورشىمىزگە 2 رەت رەسمي ءىس-ساپارمەن بارعان. سىرتقى ساياساتتا رەسەيدەن كەيىنگى ورىندا ورتالىق ازيا ەلدەرى تۇر. بۇل باعىتتا نۇرسۇلتان نازارباەۆ ايماقتاعى وزگە ەلدەرمەن سالىستىرعاندا وزبەكستانعا كوبىرەك كوڭىل بولگەن. ول وزبەكستان پرەزيدەنتى شاۆكات ميرزيەەۆپەن ءۇش رەت كەزدەسىپ، بەس رەت تەلەفون ارقىلى سويلەسىپ، ءبىر رەت رەسمي ءىس-ساپارمەن بارعان.

نۇرسۇلتان نازارباەۆتىڭ 2017 جىلعى كەزدەسۋلەرى :

ال ەل ىشىنە كەلەتىن بولساق، 2017 جىلى نۇرسۇلتان نازارباەۆ اتىراۋ، باتىس قازاقستان، پاۆلودار جانە سولتۇستىك قازاقستان وبلىستارىنان وزگەسىنىڭ بارلىعىنا بارعان. بۇدان بولەك اقوردادا ءتۇرلى ۆەدومستۆا باسشىلارى مەن وبلىس اكىمدەرىن بىرنەشە مارتە قابىلداعان. ولاردىڭ ىشىندە ۇقك باسشىسى كارىم ءماسىموۆ، ءىىم قالمۇحامەت قاسىموۆ جانە قورعانىس ءمينيسترى ساكەن جاسۇزاقوۆ پرەزيدەنت قابىلداۋىندا كوپ بولعان. بۇل رەسمي اقوردانىڭ نەگىزگى نازارى كۇشتىك قۇرىلىمداردا دەگەنگە مەڭزەيدى.

“The Qazaq Times”