فوتو: Golden State Times

دونالد ترامپ امەريكانىڭ يەرۋساليمدى ءيزرايلدىڭ استاناسى دەپ جاريالاۋىنا قارسى بولعان مەملەكەتتەردى "اقش-تىڭ جاۋلارى" دەپ اتادى. وتكەن جىلدىڭ 6 جەلتوقسانىندا قابىلدانعان شەشىمدى بۇۇ-نىڭ باس اسسامبلەياسى زاڭدى كۇشى جوق دەپ تانىدى. اقش پرەزيدەنتىنىڭ مالىمدەمەسىنە نەگىز بولعان مەملەكەتتەردىڭ سانى، شامامەن - 128. ويتكەنى اقش-تىڭ يزرايل-پالەستينا ماسەلەسىندەگى شەشىمىن ايىپتايتىن رەزوليۋتسيانى 128 مەملەكەت قولداپ، 7 ەل قارسىلىق بىلدىرگەن. ال 35 مۇشە مەملەكەت داۋىس بەرۋدەن قالىس قالعان. بۇل تۋرالى ءال-جازيرا اقپاراتتىق اگەنتتىگى جازدى. 

دونالد ترامپ ءوز سوزىندە: "بىرقاتار مەملەكەتتەر بۇۇ-نىڭ باس اسسامبلەياسىندا اقش-تىڭ يەرۋساليمدى ءيزرايلدىڭ استاناسى دەپ تانۋ قۇقىعىنا قارسى داۋىس بەردى. امەريكانىڭ سالىق تولەۋشىلەرىنىڭ قارجىسىنان جىل سايىن بۇل مەملەكەتتەرگە شەتەلدىك كومەك ەسەبىندە ميللياردتاعان دوللار قارجى جىبەرىلەدى. مەن بۇگىن كونگرەسسكە امەريكانىڭ سىرتقا كەتەتىن قارجىسى مەملەكەتىمىزدىڭ مۇددەسىنە عانا قىزمەت ەتىپ، اقش-تىڭ دوستارىنا باعىتتالعانىن قاداعالاۋدى تاپسىرامىن", - دەدى.

اقش وسىعان دەيىن ءوز جاۋلارىنىڭ قاتارىن "تەرروريزمدى قولداعان", "يادرولىق قارۋدان باس تارتپاعان" مەملەكەتتەرمەن عانا شەكتەپ، ول تىزىمگە سولتۇستىك كورەيا، يران، سۋدان مەن سيريانى كىرگىزگەن ەدى.

ءال-جازيراعا پىكىر بىلدىرگەن مەملەكەتتىك دەپارتامەنت وكىلى بۇۇ قابىلداعان رەزوليۋتسيانىڭ يزرايل مەن پالەستينا اراسىندا قالىپتاسقان داۋدى شەشۋگە ەشقانداي ۇلەس قوسپايتىنىن ايتقان. اقش-تىڭ شەشىمىنە قارسى شىققان مەملەكەتتەردىڭ قاتارىندا ۇلىبريتانيا، ەۋرووداقتىڭ باسىم بولىگى، يراك پەن اۋعانستان دا بار.

 “The Qazaq Times”