تەرەزا مەي قىتايدا رەسمي ساپاردا

ۇلىبريتانيانىڭ پرەمەر-ءمينيسترى تەرەزا مەي كەشە قىتاي ورتالىق قالاسى بەيجىڭدە رەسمي ساپارىن باستادى. ونىڭ ساپارىنىڭ باستى ماقساتى ۇلىبريتانيا مەن قىتاي اراسىنداعى ساۋدا قارىم-قاتىناسىن تەرەڭدەتۋ جانە ۇلىبريتانيانىڭ الەمدىك امبيتسياسىن كورسەتۋگە باعىتتالعان. بۇل تۋرالى «WSJ» باسىلىمى، «شينحۋا» اقپاراتتىق اگەنتتىكتەرى حابارلايدى.

تانىمال The Wall Street Journal باسىلىمىنىڭ ايتۋىنشا، تەرەزا مەي ءۇشىن قىتاي ساپارى اسا ماڭىزدى بولعان. بۇل الداعى ۋاقىتتا ەو-دان قول ۇزگەن بريتانيا ەكونوميكاسىنىڭ بولاشاعىنا بەرىك نەگىز قالايتىن ساپار بولادى دەپ كۇتكەن. الايدا، قازىرگى كەزدە بريتانيانىڭ ەو-دان شىعۋ تۋرالى كەلىسسوزدەرىنە قاتىستى ىشكى تالاس-تارتىس پەن داۋ-داماي پرەمەردىڭ بۇل ساپارىن ماعىناسىز ەتىپ قويعانداي.

تەرەزا مەي بريتانيا ۇكىمەتىنىڭ 50 نەگىزگى وكىلىن باستاپ، قىتايدا ءۇش كۇندىك ساپاردا بولماق. ساپاردىڭ كۇن ءتارتىبى بويىنشا قىتاي باسشىسى شي جينپيڭمەن جۇما كۇنى كەڭەيتىلگەن وتىرىس وتكىزەدى.

قىتايدىڭ «شينحۋا» اقپاراتتىق اگەنتتىگىنىڭ حابارىنا قاراعاندا، تەرەزا مەي قىتايدىڭ وڭتۇستىك قالالارىنا دا ساپارلايدى. قىتايدىڭ ستۋدەنتتەر قالاسى ۋحاندا جاساعان بايانداماسىندا مەي، ۇلىبريتانيا-قىتاي اراسىنداعى ءبىلىم سالاسىنداعى تەرەڭ ىنتىماقتاستىق تۋرالى سويلەگەن. ول ۇلىبريتانيادا 155 مىڭ قىتايلىق ستۋدەنتتىڭ ءبىلىم الىپ جاتقانىن، ۇلىبريتانيا ەكونوميكاسىنا جىل سايىن 7 ملرد اقش دوللارى كىرىس تۇسىرگەنىن العا تارتقان.

 “The Qazaq Times”