Tereza Mey Qıtay prem'er ministri Li Kıçyañmen kezdesti. Foto: WSJ.

Wlıbritaniyanıñ prem'er-ministri Tereza Mey keşe Qıtay ortalıq qalası Beyjiñde resmi saparın bastadı. Onıñ saparınıñ bastı maqsatı Wlıbritaniya men Qıtay arasındağı sauda qarım-qatınasın tereñdetu jäne Wlıbritaniyanıñ älemdik ambiciyasın körsetuge bağıttalğan. Bwl turalı «WSJ» basılımı, «Şinhua» aqparattıq agenttikteri habarlaydı.

Tanımal The Wall Street Journal basılımınıñ aytuınşa, Tereza Mey üşin Qıtay saparı asa mañızdı bolğan. Bwl aldağı uaqıtta EO-dan qol üzgen Britaniya ekonomikasınıñ bolaşağına berik negiz qalaytın sapar boladı dep kütken. Alayda, qazirgi kezde Britaniyanıñ EO-dan şığu turalı kelissözderine qatıstı işki talas-tartıs pen dau-damay prem'erdiñ bwl saparın mağınasız etip qoyğanday.

Tereza Mey Britaniya ükimetiniñ 50 negizgi ökilin bastap, Qıtayda üş kündik saparda bolmaq. Sapardıñ kün tärtibi boyınşa Qıtay basşısı Şi Jinpiñmen jwma küni keñeytilgen otırıs ötkizedi.

Qıtaydıñ «Şinhua» aqparattıq agenttiginiñ habarına qarağanda, Tereza Mey Qıtaydıñ oñtüstik qalalarına da saparlaydı. Qıtaydıñ studentter qalası Uhanda jasağan bayandamasında Mey, Wlıbritaniya-Qıtay arasındağı bilim salasındağı tereñ ıntımaqtastıq turalı söylegen. Ol Wlıbritaniyada 155 mıñ qıtaylıq studenttiñ bilim alıp jatqanın, Wlıbritaniya ekonomikasına jıl sayın 7 mlrd AQŞ dolları kiris tüsirgenin alğa tartqan.

 “The Qazaq Times”