پۋتين سايلاۋدا جەڭىمپاز بولاتىنىن بىلە تۇرا نەدەن قورىقتى؟

رەسەي قالالارىندا ناۋرىز ايىندا وتەتىن پرەزيدەنت سايلاۋىنا قارسى نارازىلىق شارالارى وتۋدە. شارانى ۇيىمداستىرۋشى رەتىندە الەمدىك باسىلىمدار وپپوزيتسيا وكىلى الەكسەي ناۆالنىي دەپ كورسەتۋدە. ەل ورتالىعى ماسكەۋدەن تىس بىرنەشە قالادا وتكەن شەرۋدە «18 ناۋرىزعا جوسپارلانعان پرەزيدەنت سايلاۋىن توقتاتۋ كەرەك» دەگەن تالاپ قويىلعان.

بيىل ناۋرىز ايىندا رەسەيدە بولاتىن پرەزيدەنت سايلاۋى تۋرالى حابارلانعان كەزدەن-اق، رەسەيلىكتەر دە، كوپتەگەن شەتەلدىكتەر دە سايلاۋ ناتيجەسىنىڭ قالاي بولاتىنىن انىق ءبىلدى. ءتىپتى، باق وكىلدەرى كەزەكتى سايلاۋدا داۋىس بەرۋشىلەردىڭ 80 پايىزى ۆلاديمير ءپۋتيندى قولداپ بەرەتىنىن دە جازدى. الايدا، رەسەيدى اشسا الاقانىندا، جۇمسا جۇدىرىعىندا ۇستاعان پۋتين، وپپوزيتسيا وكىلدەرىنەن نەگە سونشا قورقادى؟ ونىڭ الەكسەي ناۆالنىيدى پرەزيدەنت ۇمىتكەرلىگىنەن شەتتەتۋىنىڭ سىرى نەدە؟

ۇكىمەتتىڭ قىسىمىنا قاراماستان الەكسەي ناۆالنىي نارازىلىق شاراسىن بەلسەنە ۇيىمداستىرۋدا. شاراعا قاتىسۋشىلار «جالعان سايلاۋ توقتاتىلسىن» دەپ ۇرانداپ، پرەزيدەنت سايلاۋدىڭ ناتيجەسىن انىق بىلەتىندەرىن ايتۋدا. VOA-China پورتالىنىڭ حابارىنا قاراعاندا، ناۆالنىي ءوزىنىڭ پرەزيدەنت سايلاۋىنا ۇسىنىلعان كانديداتۋراسىنىڭ الىنىپ تاستالعانى ءۇشىن نارازىلىق اكتسياسىن ۇيىمداستىرىپ وتىر. ەرەۋىلشىلەر اراسىنا كەلىسىممەن پوليتسەيلەر جاعىنان قولعا الىنعان، الايدا ارتىنشا بوساتىلعان.

ال، باتىستاعى تانىمال «The Times» باسىلىمىنىڭ ايتۋىنشا، رەسەي پرەزيدەنتى ۆلاديمير پۋتين وپپوزيتسيالىق كۇشتەردى قۋدالاۋدى جالعاستىرا بەرسە ەلدەگى قولداۋىنان ايىرىلىپ قالۋى مۇمكىن. سايلاۋدا ءبىر عانا جەڭىمپازدىڭ بار ەكەنىن، ول ۆلاديمير پۋتين ەكەنىنە ناۆالنىي دە كۇماندانبايدى. ول بۇل «جالعان سايلاۋدىڭ» رەسەي بولاشاعىنا سالىنعان تۇساۋ ەكەنىن ايتۋدا. بىراق، ءپۋتيندى الاڭداتىپ وتىرعانى ماسكەۋدەگى قوعامدىق زەرتتەۋ ينستيتۋتىنىڭ زەرتتەۋ قورىتىندىسى بولسا كەرەك. وندا رەسەي ىشىندە جۇرگىزىلگەن ساۋالنامالار ناتيجەسىندە كوپتەگەن رەسەيلىكتەردىڭ باسىم كوبى مەملەكەتتىك جۇيەدەگى جاڭالىقتى قالايتىنى انىقتالعان.

ءوزىن «بەيبىتشىلىك قورعاۋشىسى» ەتىپ كورسەتۋگە تىرىسقان پۋتين ءسۇريادان ورىس اسكەرلەرىن شىعاردى جانە ۋكرايناداعى جاعدايدا بىرقاتار وڭدى قادامدار جاساپ جول بەرگەندەي بولدى. ونداعى ماقساتى باتىس ەلدەرىنىڭ سانكتسيالارىن جەڭىلدەتۋ ەكەنى انىق. دەگەنمەن، سانكتسيا سوققىسىنان قاجىعان رەسەيلىك قوعامنىڭ بيلىكتى وزگەرتۋگە دەگەن ىنتاسى دا جوق ەمەس. بۇل كورىنىس پۋتين ءۇشىن جاعىمدى ەمەس. سوندىقتان دا وپپوزيتسيا وكىلدەرىن پرەزيدەنت ۇمىتكەرلەرى اراسىنا جولاتپاي، ءوزىنىڭ تۇعىرىن ساقتاپ قالۋعا تىرىسادى. پرەزيدەنتتىككە ۇمىتكەرلىگى الىنىپ تاستالعان الەكسەي ناۆالنىي پۋتين رەجيمىن الەككە سالىپ تۇر. ول ەلدەگى جەمقورلىق تۋرالى مالىمەتتەردى العا تارتىپ، سايلاۋدىڭ توقتاتىلۋىن تالاپ ەتۋدە. بۇل دا بولسا رەسەيدىڭ ساياسي جاعدايىنىڭ شيەلەنىسىن ايعاقتايدى.

“The Qazaq Times”