فوتو: politpuzzle.ru

تۇركيانىڭ سۇرياداعى كۇرد جاساقتارىنا قارسى اسكەري وپەراتسياسى بارىسىندا ءۇش تۇرىك سولداتى قازا تاپتى.  سوعىس الاڭىندا مەرت بولعان ازاماتتاردىڭ ءبىرىنىڭ  انكارادا وتكەن جەرلەۋ راسىمىندە تۇركيانىڭ پرەمەر-ءمينيسترى بينالي يىلدىرىم اسكەري وپەراتسيانىڭ سوڭعى "تەررورىڭ" (تۇركيا سۇرياداعى كۇرد جاساقتارىن "تەرروريستىك ۇيىمدار" قاتارىنا قوسقان) كوزى جويىلعانشا جالعاساتىنىن، ال رەدجەپ تايىپ ەردوعان ونىڭ جەڭىسپەن اياقتالارىنا كۇمانسىز سەنەتىنىن مالىمدەدى. كۇرد جاساقتارىمەن بىرگە وڭىردەگى "يسلام مەملەكەتى" لاڭكەستىك ۇيىمىنا قارسى كۇرەس جۇرگىزىپ كەلگەن، ءبىر كەزدەرى ولاردى قارۋلاندىرعان اقش تۇركيا باستاعان اسكەري وپەراتسيا  سۇرياداعى ازاماتتىق سوعىس ءورتىن قايتا تۇتاندىرادى دەپ قاۋىپتەنەدى. بۇل تۋرالى AFP اقپاراتتىق اگەنتتىگى جازدى. 

اقش-تىڭ قورعانىس ءمينيسترى دجيم مەتتيس "تۇركيانىڭ اسكەري قيمىلدارى سۇرياداعى "يسلام مەملەكەتى" سياقتى لاڭكەستىك ۇيىمدار مەن تەرروريستىك توپتارعا قارسى كۇرەسكە كەدەرگى كەلتىرەدى" دەپ، انكاراعا ەسكەرتۋ جاسادى. ەۋروپا وداعى مەن فرانتسيا مەملەكەتى دە اقش-تىڭ الاڭداۋشىلىعىنا قوسىلاتىنىن ءبىلدىردى. رەسمي انكارا سۇرياداعى كۇرد جاساقتارىنىڭ تۇركيادا ونداعان جىلدار بويى قارسىلىقتار ۇيىمداستىرىپ، مىڭداعان ادامنىڭ ولىمىنە سەبەپكەر بولعان كۇردىستان جۇمىسشىلار پارتياسىمەن تىعىز بايلانىسى بارىن ايتىپ، ءوز شەشىمىنىڭ وزەكتىلىگىن اتاپ ءوتتى.

ادام قۇقىقتارى جونىندەگى The Observatory ۇيىمىنىڭ حابارلاۋىنشا، تۇركيا تاراپىنان 43 اسكەر سوعىس الاڭىندا جان تاپسىرىپ، كۇرد جاساقتارى 38 ادامىنان ايىرىلعان. باياندامادا تاعى 28 بەيبىت تۇرعىننىڭ ءولىمى تۋرالى ايتىلادى. دەگەنمەن تۇركيا ءوزىنىڭ تەك كۇرد اسكەرىن عانا نىساناعا العانىن ايتىپ، قاتارداعى تۇرعىنداردىڭ قازاسىن مويىنداماي وتىر.

انادولى اقپاراتتىق اگەنتتىگى تۇركيانىڭ شەكارادان ءسۇريانىڭ ىشكى وڭىرىنە قاراي كىرگەنىن، افرين ايماعىنداعى بىرنەشە اۋىلداردى باسىپ العانىن جازدى. سونداي-اق سوڭعى ەكى كۇن ىشىندە ءسۇريا جاقتان اتىلعان زىمىران كەسىرىنەن تۇركيانىڭ شەكارادا ورنالاسقان اۋىلىندا ەكى بەيبىت تۇرعىننىڭ قازا تاپقانى بەلگىلى بولدى.

تۇركيانىڭ سىرتقى ىستەر ءمينيسترى مەۆليۋت چاۆۋشوعلى سارسەنبى كۇنى رەدجەپ تايىپ ەردوعان مەن دونالد ترامپتىڭ تەلەفون ارقىلى سويلەسەتىنىن حابارلادى. قوس ەل باسشىسى اسكەري وپەراتسيانىڭ بارىسىن تالقىلايدى دەپ كۇتىلۋدە. وسىعان دەيىن تۇركيا باسشىلىعى رەسەي اسكەر وپەراتسيانى قولداعانىن ايتقان ەدى.  ماسكەۋ ءدال وسى حابارلامانى رەسمي راستاعان جوق. دەگەنمەن بىرقاتار ساراپشىلار "تۇركيا رەسەيدىڭ كەلىسىمىنسىز مۇنداي ۇلكەن قادامعا بارماس ەدى" دەگەن پىكىر ءبىلدىردى.

“The Qazaq Times”