ەردوعان: سۇرياداعى اسكەري وپەراتسيا ماسكەۋمەن كەلىسىلگەن

تۇركيا پرەزيدەنتى رەجەپ تايىپ ەردروعان سوزىندە تۇركيا قارۋلى كۇشتەرىنىڭ سۇرياعا كىرۋىن ماسكەۋمەن اقىلداسقانىن ايتتى. كەشە ەلدىڭ قارۋلى كۇشتەرى كۇرد قارۋلى كۇشتەرىنە سوققى بەرۋ ءۇشىن ءسۇريانىڭ سولتۇستىك-باتىسىنداعى بىرنەشە ەلدى مەكەندەردى يەلەگەنىن حابارلاعان ەدى. ەل پرەزيدەنتى بولسا اسكەري قادامداردىڭ بۇنىمەن توقتاپ قالمايتىنىن جەتكىزگەن. بۇل تۋرالى BBC ونلاين قىزمەتى حابارلادى.

تۇركيا پرەزيدەنتى سوزىندە: «ءبىز بۇل وپەراتسيا تۋرالى رەسەيلىك دوستارىمىزبەن اقىلداسقانبىز. ءبىزدىڭ كەلىسىمدەرىمىز بار»، – دەدى. ول جانە وپەراتسيا تۋرالى ۋاشينگتون بيلىگىمەن دە سويلەسكەن، الايدا، اقش جاق تۇركيامەن پىكىر بىرلىگىنە كەلە الماعان. بىراق، قانداي ماسەلەلەر توڭىرەگىندە سويلەسكەنى تۋرالى اشىپ ايتپادى.

تۇركيانىڭ سۇرياعا شەكارالاس وڭتۇستىك جانە وڭتۇستىك-شىعىس شەكارا ايماقتارىندا كۇرد وكىلدەرى كوبىرەك قونىستانعان. ولاردىڭ كۇردىستان جۇمىسشى پارتياسى 1984 جىلدان بەرى اۆتونوميا الۋ ءۇشىن كۇرەسىپ كەلەدى. ءسۇريا جەرىندەگى كۇردتەردىڭ حالىقتىڭ ءوزىن قورعاۋ قوسىندارى (PKK) انكارا جاعىنان تەررورلىق ۇيىم دەپ تانىلعان ءارى كۇرد جۇمىسشى پارتياسىمەن ءبىر ۇيىم دەپ سانالدى. الايدا PKK وزدەرىنىڭ اتالعان پارتيامەن بايلانىسى جوق ەكەنىن العا تارتقان.

تۇركيانىڭ بۇل اسكەري قادامدارى ونىڭ ناتو-داعى وداقتاستارىمەن ارازدىعىن كۇشەيتۋى مۇمكىن دەگەن بولجام بار. «انادولى» اقپاراتتىق اگەنتتىگىنىڭ حابارىنا قاراعاندا، تۇرىك ارمياسى افرين ايماعىنداعى 4 ەلدى مەكەندى يەلەدى دەلىنگەن. الايدا، سۇرياداعى ادام قۇقىقتارى جونىندەگى ورتالىق كۇرد قارۋلى جاساقتارىنىڭ دا كۇشتى قارسىلىق كورسەتىپ جاتقانىن، ءتىپتى ەكى ەلدى مەكەننەن تۇرىك قارۋلى كۇشتەرىن شەگىندىرىپ شىعارعانىن مالىمدەگەن.

تۇركيانىڭ اسكەري قادامدارىن ءسۇريا، يران جانە مىسىر ۇكىمەتتەرى قاتاڭ ايىپتاۋدا. ەردوعان بولسا، كۇرد ەلدىك قورعاۋ قوسىندارىن تەز ارادا تالقاندايتىنىن جەتكىزدى. الايدا، اقش پەن فرانتسيا باستاعان باتىس ەلدەرى تۇركياعا اتىستى توقتاتۋ تۋرالى ەسكەرتىپ كەلەدى. باشار اساد تۇركيانىڭ اسكەري ارەكەتىن «اسقىنعان تۇرىك اگرەسسياسى» قاتارىندا باعالاپ، سۇرياداعى وزگە تەررورلىق توپتاردى قولداۋمەن بىردەي دەپ ايىپتاعان. يراك تا ءسۇريا جاعدايىن جاقسارتۋ ءۇشىن اتىستى توقتاتۋعا شاقىرىپ وتىر.

باس شتاب پاتەرى لوندوندا ورنالاسقان سۇرياداعى ادام قۇقىقتارى جونىندەگى ورتالىقتىڭ بەرگەن مالىمەتىندە، افرين ايماعىنداعى قاقتىعىستان 18 جازىقسىز تۇرعىننىڭ قازا تاپقانى ايتىلدى. ونىڭ كوبى دەرلىك جەكسەنبى كۇنگى جاسالعان اۋە شابۋىلدارىندا كوز جۇمعان. جەكسەنبى كۇنى بولعان شايقاستا 4 تۇركيالىق، 10 سۇريالىق اسكەر وققا ۇشقان. الايدا، بۇل مالىمەتتەردى تۇركيا تارابى راستامادى. تۇركيا جاقتىڭ حابارىندا كۇرد قوسىندارى اتقان زىمىراندار كيليس جانە رەيحانلى قالالارىنا تۇسكەنى ايتىلعان. تۇركيا اسكەرلەرى افرين ايماعىن وتكەن بەيسەنبىدەن بەرى ارتيللەريالىق شابۋىل نىساناسى ەتىپ كەلەدى.

“The Qazaq Times”