فوتو: 3DToday

قازاقستاندا ازاماتتىق اۆياتسيا سالاسىنا جاۋاپ بەرەتىن ۇلتتىق كومپانيا قۇرىلادى. بۇل تۋرالى قر ينۆەستيتسيالار جانە دامۋ ءمينيسترى جەڭىس قاسىمبەك مالىمدەدى. 

ونىڭ ايتۋىنشا، وسى مىندەتتى ىسكە اسىرۋ ءۇشىن مينيسترلىك دايىندىق جۇمىستارىن جاساپ، بريتان ازاماتتىق اۆياتسيا اگەنتتىگىمەن ءوزارا تۇسىنىستىك تۋرالى مەموراندۋمعا قول قويىلعان، بريتاندىق ماماندار قازاقستانعا بىرنەشە رەت كەلىپ، تەحنيكالىق ىنتىماقتاستىق جوبالارى پىسىقتالىپتى.

"بىرلەسكەن جۇمىستار نەگىزىندە ءبىز بريتاندىق مودەلدى ەنگىزۋدىڭ تاسىلدەرىن جاسادىق. وندا قولدانىستاعى زاڭناماعا ۇشۋ قاۋىپسىزدىگى سالاسىنداعى باقىلاۋ فۋنكتسيالارىن ازاماتتىق اۆياتسيا سالاسىنداعى قاداعالاۋ مەن باقىلاۋ جونىندەگى ۇلتتىق كومپانيا تۇرىندەگى جاڭا قۇرىلىمعا اۋىستىرۋ تۋرالى مينيسترلىكتىڭ الدىندا ەسەپ بەرەتىندەي وزگەرىستەر ەنگىزىلەتىن بولادى. ينسپەكتور رەتىندە جۇمىس ىستەيتىن كەيبىر قىزمەتكەرلەر ۇلتتىق كومپانياعا اۋىسادى. مينيسترلىك مەملەكەتتىك ساياساتتى قالىپتاستىرۋ مەن حالىقارالىق قاتىناس ماسەلەلەرىنە جاۋاپ بەرەدى",- دەدى جەڭىس قاسىمبەك ۇكىمەت وتىرىسىندا جاساعان بايانداماسىندا.

ۆەدومستۆو باسشىسى بۇل كومپانيانىڭ قالاي قارجىلاندىرىلاتىنىن دا اتاپ ءوتتى. ونىڭ سوزىنشە، "ۇلتتىق كومپانيا قاراجاتتى ءوزى تابۋعا ءتيىس" ەكەن.

"بۇكىل الەمدەمەملەكەتتىك كومپانيالار جۇزەگە اسىراتىن  بۇل قىزمەتتەردىڭ قۇنى تولەنەدى. قازىرگى كەزدە بۇل كوميتەت ارقىلى جۇزەگە اسۋدا، ءبىز ونى تالاپ ەتپەيمىز. بيۋدجەتتەن قوسىمشا قارجى الۋدى جوسپارلاپ وتىرمىز", - دەدى ول.

ايتا كەتەيىك، بۇدان بۇرىن قازاقستاندا تۋريزم سالاسىن دامىتۋ ماقساتىندا "قازاق تۋريزم" ۇلتتىق كومپانياسى قۇرىلعان ەدى. الايدا قازاقستاندا ۇلتتىق كومپانيالار قۇرىلعانمەن، ءالى ءوزىنىڭ تيىمدىگىن كورسەتە الماي كەلەدى.

“The Qazaq Times”