جوو جاتاقحانالارىن سالۋعا قارجى بولىنبەيتىن بولدى

ەندى جوعارى وقۋ ورىندارىنداعى جاتاقحانالار، اسحانالار جانە كىتاپحانالار قۇرىلىسى رەسپۋبليكالىق بيۋدجەت ەسەبىنەن قارجىلاندىرىلمايتىن بولدى. بۇل تۋرالى قر ءبىلىم جانە عىلىم ءمينيسترى ەرلان ساعاديەۆكە سىلتەمە جاساپ  Tumba.kz سايتى حابارلادى.

ءمينيستردىڭ سوزىنشە، وتكەن جىلى مينيسترلىك قارجىنى وسىلاي ۇنەمدەۋ ارقىلى باكالاۆريات بويىنشا گرانت سانىڭ 10 مىڭعا، ماگيستراتۋرانىكىن 1000-عا ارتتىرعان. جالپى گرانت سانى 25-30 پايىزعا كوبەيگەن.

"بارلىق قاراجات جوعارى وقۋ ورىندارىنا جىبەرىلەدى. قارجى ەركىندىگى قاراستىرىلىپ جاتىر. مۇعالىمدەردىڭ قانشا الاتىنىن ءبىز ەسەپتەن شىعارىپ تاستاۋعا تىرىسىپ جاتىرمىز. مۇنى ءبىز ينۆەستيتسيالىق باعدارلامالارمەن بىرگە ءوزىن اقتاۋ ماقساتىندا جوو-عا بەرەمىز. بىراق جوعارى وقۋ ورىندارىن قاداعالاۋ كەڭەسى كۇشەيتىلەدى. ونىڭ وكىلەتتىگى ارتادى، ىشكى اۋديت قىزمەتى قۇرىلىپ، ول تەك قاداعالاۋ كەڭەسىنە توراعالىق ەتەدى", - دەدى مينيستر.

ونىڭ سوزىنشە، بارلىق مەملەكەتتىك جوو-لار كوممەرتسيالىق ەمەس اكتسيونەرلىك ۋنيۆەرسيتەتتەر رەتىندە تانىلۋ ارقىلى جاڭا مارتەبەگە يە بولاادى. قاداعالاۋ كەڭەسى اۆتوماتتى تۇردە ديرەكتورلار كەڭەسىنە اينالىپ، ونىڭ وكىلەتتىكتەرى ودان دا ارتا تۇسپەك.  كادرلار، تاعايىنداۋلار، جالاقى، ينۆەستيتسيالىق باعدارلامالار، ستراتەگيالار قاداعالاۋ كەڭەسىنە، كەيىن ديرەكتورلار كەڭەسىنە بەرىلەدى.

ال اكادەميالىق ەركىندىك زاڭى شەتەلدىك ستۋدەنتتەر ارقىلى تابىس تابۋعا مۇمكىندىك بەرمەك. سونداي-اق، قارجىنى ءبولۋ ەرەجەلەرىنەن بوساتۋ دا جۇزەگە اسادى. ءمينيستردىڭ پىكىرىنشە، بۇل جوو-عا ءوز رەسۋرستارىن ۇنەمدەۋگە جانە جيناۋعا مۇمكىندىك بەرمەك.

وسىلاي دەگەن مينيستر بيىل جاتاقحانالار قۇرىلىسىنا ءبىر تيىن دا بولىنبەيتىنىن، ونىڭ ءبارى گرانتقا جۇمسالاتىنىن اتاپ ءوتتى.

“The Qazaq Times”